ગુજરાત રાજ્ય માર્ગ અને વાહન વ્યવહાર નિગમના રાજકોટ એસટી ડિવિઝનના વિભાગીય નિયામક જે.બી. કલોતરાના આદેશથી નો-પાર્કિગ ઝોનના ભંગ અંગે તેમજ સીઓ ચેકિંગ અંતર્ગત એસટી બસના મુસાફરો છીનવી જતા ૧૦૪ ખાનગી વાહનો જપ્ત કરી સ્થળ ઉપર હાજર દંડ પેટે રૂ.૭૬,૦૦૦ તેમજ ડિટેઇન થયેલા વાહનોને રૂ.૫,૭૭,૩૦૦નો દંડ ફટકારવામાં આવ્યો હતો.

વિશેષમાં રાજકોટ એસટી ડિવિઝન કચેરીના વર્તુળોમાંથી પ્રાપ્ત વિગતો મુજબ રાજકોટ શહેરમાં ઢેબર રોડ એસટી બસ પોર્ટ વિસ્તાર ઉપરાંત શહેરના વિવિધ એન્ટ્રી પોઇન્ટ્સ ઉપરના બસ સ્ટોપ્સ જેમાં રાજકોટ-અમદાવાદ હાઇવે ઉપર ગ્રીનલેન્ડ ચોકડી, રાજકોટ-જામનગર હાઇવે ઉપર માધાપર ચોકડી, રાજકોટ-જૂનાગઢ હાઇવે ઉપર ગોંડલ રોડ ચોકડી, રાજકોટ-મોરબી હાઇવે ઉપર બેડી ચોકડી, રાજકોટ-કાલાવડ હાઇવે ઉપર કેકેવી ચોક તેમજ રિંગ રોડ-૨ જંકશન અને રાજકોટ-ભાવનગર હાઇવે ઉપર આજી ડેમ ચોકડી સહિતના વિવિધ એસટી બસ સ્ટોપ્સ ઉપર એસટી બસની રાહ જોઇને ઉભેલા મુસાફરોને લઇ જતા ખાનગી વાહનો ડિટેઇન કરવામાં આવ્યા જેમાં ઇકો કાર, તુફાન જીપ, સિટી રાઇડ, મીની બસ તેમજ ખાનગી ટ્રાવેલ્સ કંપનીની લકઝરી બસ સહિતના વાહનો સમાવિષ્ટ છે.રાજકોટ શહેર ઉપરાંત રાજકોટ એસટી ડિવિઝન હેઠળના ગોંડલ, મોરબી, જસદણ, ચોટીલા, વાંકાનેર, લીંબડી, ધ્રાંગધ્રા અને સુરેન્દ્રનગર સહિતના તમામ નવ ડેપોને પણ ઉપરોક્ત મુજબ નો પાર્કિંગ ઝોન અને સીઓ ચેકિંગ કરવા આદેશ જારી કરવામાં આવ્યા હોવાનું જાણવા મળે છે. ઉપરોક્ત કાર્યવાહીમાં એસટી નિગમની ટીમ સાથે ટ્રાફિક પોલીસ અને આરટીઓની ટીમ પણ જોડાઇ હતી.