પોરબંદરના સુભાષનગર નજીક ખાડીમાંથી અજાણ્યા વ્યક્તિનો કોહવાયેલો મૃતદેહ શુક્રવારે મોડી સાંજે મળી આવતા પોલીસ ઘટનાસ્થળે દોડી ગઇ હતી. સાથે ફાયરબ્રિગેડ પણ લાશને બહાર કાઢવા માટે પહોંચી હતી તથા મૃતદેહને પી.એમ. માટે હોસ્પિટલે પહોંચાડયો હતો.
જાણવા મળતી વિગત પ્રમાણે પોરબંદરના બોખીરાથી સુભાષનગર તરફ જતા રસ્તે તુંબડાના નાકે ખાડીમાં અજાણી વ્યક્તિનો મૃતદેહ તરતો હોવાનું લોકોના ધ્યાને આવતા તાત્કાલિક માચ્છીમારોએ પોલીસને જાણ કરી હતી તથા લાશને બહાર કાઢવા માટે ફાયરબ્રિગેડને પણ જાણ કરવામાં આવી હતી. સ્થાનિક માચ્છીમારો સહિત ફાયરબ્રિગેડની ટીમ દ્વારા કોહવાયેલી લાશને બહાર કાઢવાની કામગીરી  હાથ ધરવામાં આવી હતી અને લાશનો કબ્જો લઇને પોસ્ટમોર્ટમ માટે સરકારી ભાવસિંહજી હોસ્પિટલ ખાતે પહોંચાડવામાં આવી હતી. બીજી બાજુ આ મૃતદેહ કોનો છે તે અંગે માહિતી મેળવવા પોલીસે માચ્છીમારોના વિસ્તારમાં પણ તપાસ હાથ ધરી હતી અને તેની ઓળખ મળ્યેથી તેમજ પોસ્ટમોર્ટમ રીપોર્ટ આવી ગયા બાદ તેના મૃત્યુનું સાચુ કારણ બહાર આવશે તેમ જણાઇ રહ્યુ છે.