ક્રાઈમ બ્રાન્ચની ટીમે રાજકોટની ભાગોળે ગ્રીનલેન્ડ ચોકડી પાસે પુલ નજીકથી કારમાં ૨૫૨ બોટલ દારૂના સાથે જામનગરના બે શખસોને ઝડપી લીધા હતા. પોલીસે દારૂનો આ જથ્થો અને કાર સહિત કુલ રૂપિયા 4.73 લાખનો મુદ્દામાલ કબજે કર્યો હતો. પોલીસ તપાસમાં દારૂનો જથ્થો મંગાવનાર તરીકે જામનગરના કરણ નામના શખસનું નામ ખુલ્યું હતું.

દારૂના આ દરોડાની જાણવા મળતી વિગતો મુજબ, ક્રાઈમ બ્રાન્ચના પીએસઆઇ સી.વી.ચુડાસમાની રાહબરી હેઠળ હેડ કોન્સ્ટેબલ કિશનભાઇ પાંભર, કોન્સ્ટેબલ અરવિંદભાઈ ફતેપરા સંજયભાઈ અલગોતર, કરણભાઈ કોઠીવાળ, પોપટભાઈ ગમારા, મહાવીરસિંહ જાડેજા, અનુજભાઈ ડાંગર સહિતનો સ્ટાફ પેટ્રોલિંગમાં હતો. દરમિયાન એવી બાતમી મળી હતી કે, ગ્રીનલેન્ડ ચોકડી પાસે અમદાવાદ હાઈવે પર રોંગ સાઈડના પુલના ખૂણે ચાની હોટલ પાસે રોડની સાઈડમાં સિલ્વર કલરની હોન્ડા ઝાઝ કાર નંબર જીજે-૧ આર.વી 4473 પડી છે. જેમાં દારૂનો જથ્થો રાખવામાં આવ્યો છે.

આ બાતમીના આધારે પોલીસની ટીમે અહીં દરોડો પાડી કારમાં સવારે બે શખસોની પૂછતાછ કરતા તેના નામ કરણ ગોવર્ધનભાઈ રાજાણી (ઉ.વ 28 રહે. જી.જી હોસ્પિટલ પાછળ, રામેશ્વરનગર, પટેલ કોલોની, જામનગર) અને કિશોર રમેશભાઈ ભારગીયા(ઉ.વ 24 રહે. ગુરુદ્વારા ચોકડી, લીમડા લઈન, દયાસાગર એપાર્ટમેન્ટ, જામનગર) હોવાનું માલુમ પડ્યું હતું. પોલીસે કારની તલાસી લેતા તેમાંથી અલગ અલગ બ્રાન્ડનો રૂપિયા 3.17 લાખની કિંમતનો 252 બોટલ દારૂનો જથ્થો મળી આવ્યો હતો. જેથી પોલીસે દારૂનો આ જથ્થો કાર અને બે મોબાઈલ સહિત કુલ રૂપિયા 4.73 લાખનો મુદ્દામાલ કબજે કર્યો હતો.

દારૂના જથ્થા સાથે ઝડપાયેલા બંને શખસોની પુછતાછ કરતાં દારૂનો આ જથ્થો જામનગરમાં ગુલાબનગર સાધુવાસવાણી એપાર્ટમેન્ટમાં રહેતા કરણ નારણભાઈ ચેલારામાણી મંગાવ્યો હોવાનું જણાવ્યું હતું. જેથી પોલીસે ત્રણેય સામે ગુનો નોંધી જામનગરના કરણને ઝડપી લેવા તપાસ હાથ ધરી છે.