પોરબંદરના બોખીરા વિસ્તારમાં ગરીબો માટે બનાવાયેલા ૨૪૪૮ આવાસ માંથી અનેક આવાસ યોજનાના ફ્લેટ ઉપર રાખવામાં આવેલ પાણીના ટાંકા લીકેજ થયા છે તો ક્યાંક પાઇપલાઇન લીકેજ થઈ છે અને તેમાંથી પાણી સતત વહી રહ્યું છે અને તેના કારણે દીવાલોને અને ઉપકરણોને નુકસાન થઈ રહ્યું છે પરંતુ તંત્રએ સમારકામ કરાવવાને બદલે રાજકોટ કે જામનગર થી પ્લમ્બરો આવશે પછી સમારકામ થશે તેમ જણાવી દેવાતા આશ્ચર્ય સર્જાયું છે.
પોરબંદર શહેરમાં મિશન સીટી યોજના હેઠળ ગરીબો માટેની આવાસ યોજનાનું નિર્માણ બોખીરામાં કરવામાં આવ્યું છે જ્યાં ૨૪૪૮ જેટલા ફ્લેટમાં ગરીબ અને જરૂરિયાતમંદ પરિવારો વસવાટ કરી રહ્યા છે. આ બિલ્ડીંગનું બાંધકામ થતું હતું ત્યારથી તે નબળી હોવાની ફરિયાદો ઉઠવા પામી હતી પરંતુ સરકારે  આંખ આડા કાન કર્યા હતા અને હાલમાં અહીંયા મોટી સંખ્યામાં પરિવારો વસવાટ કરી રહ્યા છે. ત્યારે અહીંના રહેવાસીઓ એવી ફરિયાદ કરી છે કે અમુક ફ્લેટની ઉપર પાણીના ટાંકા લીકેજ થઈ ગયા છે તો ક્યાંક પાઇપલાઇન લીકેજ થઈ ગઈ છે. અને આ મુદ્દે નગરપાલિકાના તંત્રને રજૂઆત કરવામાં આવી ત્યારે એવું જણાવ્યું હતું કે જામનગર અને રાજકોટ થી પ્લમ્બરો આવશે ત્યારબાદ સમારકામ થશે. 
લોકોએ એવું જણાવ્યું છે કે બહારથી કારીગરો આવે ત્યાં સુધીમાં પાણીને લીધે દીવાલોને ખૂબ મોટું નુકસાન થઈ રહ્યું છે. બાંધકામ નબળું થયું હોવાને કારણે છતમાંથી અવારનવાર પોપડા ખરી પડે છે અત્યારે હવે તેમાંથી પાણી ટપકી રહ્યા છે જેના કારણે લોકોને પંખા સહિત ઉપકરણોને પણ નુકસાન થઈ રહ્યું છે.
લોકોએ જણાવ્યું હતું કે પાણી દીવાલમાં ઉતરે છે જેના લીધે દિવાલો નબળી પડી રહી છે અને છતમાં પણ મોટી નુકસાની થઈ રહી છે માટે નગરપાલિકાના તંત્રએ વહેલી તકે પાણીના ટાંકાનું સ્થાનિક કક્ષાએ પ્લમ્બર બોલાવીને સમારકામ કરાવી આપવું જોઈએ અને જ્યાં પાઇપલાઇન લીકેજ હોય તે અંગે પણ યોગ્ય કાર્યવાહી કરવી જરૂરી બની ગઈ છે.