ફુલડોલ ઉત્સવના સુચારુ આયોજન અંગે નિવાસી અધિક કલેકટર ભૂપેશ જોટાણીયાની અધ્યક્ષતામાં બેઠક યોજાઇ

દ્વારકાધીશ મંદિર, દ્વારકા ખાતે હોળીના તહેવાર દરમિયાન ફૂલડોલ ઉત્સવ યોજાશે. ત્યારે ફૂલડોલ ઉત્સવના સુચારુ આયોજન અંગે નિવાસી અધિક કલેકટર ભૂપેશ જોટાણીયાની અધ્યક્ષતામાં બેઠક યોજાઇ હતી.  

આ તકે નિવાસી અધિક કલેકટર ભૂપેશ જોટાણીયાએ હોળીના તહેવાર પર બહોળી સંખ્યામાં પધારતા યાત્રિકો/ પદ યાત્રિકો માટે માર્ગ સલામતી, પીવાના પાણીની વ્યવસ્થા, સ્વચ્છતા, આરોગ્ય, પાર્કિંગ વ્યવસ્થા, સી.સી.ટી.વી કેમેરાથી ચુસ્ત બંદોબસ્ત ગોઠવવા તેમજ દિવ્યાંગ દર્શનાર્થીઓ માટે વ્હીલચેરની વ્યવસ્થા, વીજ પુરવઠો સતત જળવાઈ રહે તેની તકેદારી રાખવી સહિત બેટ દ્વારકા તેમજ શિવરાજપુર અને નાગેશ્વર સહિતના પ્રવાસન સ્થળો પર દર્શનાર્થીઓને કોઈપણ પ્રકારની અગવડતા ન પડે તેની તકેદારી રાખતા સહિત તમામ આનુષાંગિક વ્યવસ્થાઓ સુનિશ્ચિત કરવા માટે માર્ગદર્શક સૂચનો આપ્યા હતા. 

આ બેઠકમાં જિલ્લા ગ્રામ વિકાસ એજન્સી નિયામક એચ.એ.જોશી, ઇન્ચાર્જ પ્રાંત અધિકારી દ્વારકા હિમાંશુ ચૌહાણ, નાયબ કલેક્ટર રિદ્ધિ રાજ્યગુરુ, નાયબ પોલીસ અધિક્ષક હાર્દિક પ્રજાપતિ   મામલતદારસહિતના સંલગ્ન વિભાગના અધિકારીઓ ઉપસ્થિત રહ્યા હતા.

​​​​​​​