ભેજવાળા વાતાવરણ અને ધુમ્મસના કારણે બે દિવસ સુધી મહત્તમ તાપમાનમાં એક થી ચાર ડિગ્રી સુધીનો ઘટાડો નોંધાયા પછી ભેજનું પ્રમાણ ઘટી ગયું છે અને તેના કારણે ગરમીનું પ્રમાણ વધી ગયું છે. મહત્તમ તાપમાનમાં ફરી એક થી ત્રણ ડિગ્રીનો વધારો થયો છે અને આગામી દિવસોમાં પણ હવે ગરમી વધશે તેવી ચેતવણી હવામાન ખાતા દ્વારા આપવામાં આવી છે. શુક્રવારે સમગ્ર રાજ્યમાં સૌથી ઊંચું તાપમાન રાજકોટમાં 36.3 ડિગ્રી નોંધાયું હતું.

પોરબંદરમાં 35.1 કંડલામાં 35 અને ડાંગમાં 35.3 ડીગ્રી મહત્તમ તાપમાન નોંધાયું છે. ભુજમાં 34 નલિયામાં 32.6 ભાવનગરમાં 33.2 ડીગ્રી મહત્તમ તાપમાન રહ્યું છે દરિયાકાંઠાના વિસ્તારોમાં 30 ડિગ્રી નીચે તાપમાન હતું તે પણ વધી ગયું છે. દ્વારકામાં 30.5 ઓખામાં 30.6 વેરાવળમાં 30.9 ડિગ્રી મહત્તમ તાપમાન રહેવા પામ્યું છે.

અમદાવાદમાં 33.7 ડીસામાં 34.1 ગાંધીનગરમાં 33.4 વડોદરામાં 33.8 અને સુરતમાં 34.4 ડિગ્રી મહત્તમ તાપમાન શુક્રવારે રહેવા પામ્યું હતું.

હવામાન ખાતાના જણાવ્યા મુજબ જમ્મુ કશ્મીર લદાખ હિમાલયન રીજીયન ઉત્તરાખંડ ઉત્તર પ્રદેશ રાજસ્થાન બિહાર આસામ મેઘાલય મણીપુર નાગાલેન્ડ મિઝોરમ અંદામાન નિકોબાર સહિત દેશમાં અનેક સ્થળોએ વરસાદની આગાહી કરવામાં આવી છે. મોટાભાગના રાજ્યોમાં વરસાદ પડી રહ્યો છે અને આગામી તારીખ 24 ના રોજ નવું વેસ્ટર્ન ડિસ્ટર્બન્સ સર્જાયા પછી વરસાદની ગતિવિધિઓમાં અનેક રાજ્યોનો સમાવેશ થશે. તારીખ 24 પછી વાતાવરણમાં ફેરફારની મોટી શક્યતા નિહાળવામાં આવે છે.