જસપ્રીત બુમરાહે ટેસ્ટ ક્રિકેટમાં ઈતિહાસ રચ્યો છે. તેણે ટેસ્ટમાં પોતાની 200 વિકેટ પૂરી કરી લીધી છે. 20થી ઓછી સરેરાશ સાથે આ સિદ્ધિ મેળવનાર તે વિશ્વનો પ્રથમ બોલર છે. તેણે મેલબોર્ન ટેસ્ટમાં ઓસ્ટ્રેલિયાની બીજી ઈનિંગમાં ટ્રેવિસ હેડની વિકેટ લઈને આ ઈતિહાસ રચ્યો છે. સરળ શબ્દોમાં કહીએ તો તે ટેસ્ટમાં હેડ તેનો 200મો શિકાર બન્યો છે. બુમરાહે તેની 200મી વિકેટ લઈને માત્ર ઈતિહાસ જ નથી રચ્યો પરંતુ હેડના 31મા જન્મદિવસની મજા પણ બગાડી છે.

ટ્રેવિસ હેડ 29 ડિસેમ્બર, 2024 ના રોજ 31 વર્ષનો થયો. ઓસ્ટ્રેલિયા તેના જન્મદિવસ પર તેની પાસેથી મોટી ઇનિંગ્સની અપેક્ષા રાખતું હતું પરંતુ, પ્રથમ દાવની જેમ, બુમરાહે બીજી ઇનિંગમાં પણ હેડને પેવેલિયન પરત કરવામાં વિલંબ કર્યો ન હતો. પોતાના 31માં જન્મદિવસે બેટિંગ કરવા આવેલ હેડ માત્ર 1 રન બનાવી શક્યો હતો.

19.56ની એવરેજ સાથે 200 ટેસ્ટ વિકેટ

જાણો બુમરાહની 200 વિકેટ વિશેની ખાસ વાતો. જસપ્રીત બુમરાહ ટેસ્ટ ક્રિકેટમાં 200 વિકેટ લેનારો ભારતનો છઠ્ઠો બોલર છે પરંતુ આ માઈલસ્ટોનને સૌથી ઝડપી પહોંચનાર તે બીજો બોલર છે. 20 થી ઓછી એવરેજ સાથે 200 ટેસ્ટ વિકેટ લેનાર તે વિશ્વનો એકમાત્ર બોલર છે. બુમરાહે ટેસ્ટમાં 19.56ની એવરેજથી 200 વિકેટ લીધી છે.

110 વર્ષમાં મેલબોર્નમાં બુમરાહ જેવું કોઈ નહીં!

બુમરાહે ટેસ્ટ ક્રિકેટની 84મી ઇનિંગમાં 200 વિકેટ પૂરી કરી હતી. તેણે આ અદ્ભુત ઈતિહાસ મેલબોર્નના મેદાનમાં રચ્યો છે, જ્યાં હવે તેના નામે વધુ એક રેકોર્ડ નોંધાયો છે. બુમરાહ છેલ્લા 110 વર્ષમાં મેલબોર્નમાં સૌથી વધુ વિકેટ લેનારો વિદેશી બોલર બની ગયો છે.