જેતપુરના ભાદરના સામાકાંઠા વિસ્તારમાં રહેતા દારૂના ધંધાર્થી સાજીદ ઉર્ફે સાજલો નામના યુવાનની અજાણ્યા શખસોએ બોથડ પદાર્થના ઘા ફટકારી હત્યા નિપજાવી હતી. હત્યાના બનાવને લઇ જેતપુર પોલીસના સ્ટાફે તપાસ હાથ ધરી હત્યારાને ઝડપી લેવા શોધખોળ શરૂ કરી છે. યુવાનને રાત્રિના માથાકૂટ થયા બાદ તેના પર જીવલેણ હુમલો કરવામાં આવ્યો હતો. દારૂના ધંધાની હરીફાઈ સબબ આ હુમલો કરવામાં આવ્યો હોવાનું ચર્ચાઇ રહ્યું છે. જોકે હત્યાનું સચોટ કારણ જાણવા અને હત્યારાને ઝડપી લેવા પોલીસે તપાસનો ધમધમાટ શરૂ કર્યો છે.

હત્યાના આ બનાવની જાણવા મળતી વિગતો મુજબ, જેતપુરના ભાદરના સામાકાંઠા વિસ્તારમાં રહેતા સાજીદ ઉર્ફે સાજલો હાજીભાઈ શેખ (ઉ.વ 25) નામના યુવાન પર અજાણ્યા શખસોએ હુમલો કરી તેને માથાનાભાગે બોથળ પદાર્થના ઘા ફટકારી  દેતા ગંભીર ઈજા થવા સબબ યુવાનનું મોત થયું હતું. જેથી બનાવ હત્યામાં પડાયો હતો.હત્યાના આ બનાવવાને લઇ જેતપુર સીટી પોલીસ મથકના સ્ટાફે યુવાનના મૃતદેહને પીએમ માટે હોસ્પિટલ ખસેડી આગળની કાર્યવાહી હાથ ધરી હતી.

હત્યાના બનાવ અંગે વધુમાં જાણવા મળતી વિગતો મુજબ,સાજીદ ઉર્ફે સાજલો અગાઉ દારૂના સંખ્યાબંધ ગુના નોંધાઈ ચૂક્યા છે. ચાર માસ પૂર્વે જ તે પાસામાંથી જેલમુકત થયો છે. આરોપીને રાત્રે અહીંના ગોંડલ દરવાજા વિસ્તારમાં યુવાનને કેટલાક શખસો સાથે માથાકૂટ થતાં તેમણે તેના પર જીવલેણ હુમલો કર્યો હતો. જેમાં ગંભીર રીતે ઘવાયેલા યુવાનનું મોત થયું હતું.ચર્ચાતી વિગતો મુજબ યુવાન પર રાત્રીના હુમલો થયા બાદ તેને હોસ્પિટલમાં દાખલ કરાયો હતો. બાદમાં તે રાત્રે હોસ્પિટલમાંથી રજા લઈ ઘરે ચાલ્યો ગયો હતો. બાદમાં સવારના તેની તબિયત લથડતા તેનું મોત થયું હોવાનું માલુમ પડ્યું છે. બનાવને લઇ જેતપુર પોલીસે યુવાનની હત્યાનું કારણ જાણવા અને યુવાનની હત્યા નિપજાવનાર શખ્સોને શોધી કાઢવા તપાસ હાથ ધરી છે.