કચરાના ઢગલા અને ગંદકીથી ઘેરાયેલી કચેરી, સફાઈ કર્મચારીઓનો અભાવઆજકાલ પ્રતિનિધિ-ભાવનગર
મહુવા તાલુકાના કોસ્ટલ વિસ્તારમાં આવેલા નીચા કોટડા ગામની પંચાયત કચેરીની હાલત અત્યંત ખરાબ બની છે. સ્વચ્છ ભારત અભિયાનના દાવાઓની વચ્ચે આ કચેરી ગંદકીનું કેન્દ્ર બની ગઈ છે. કચેરી પરિસરમાં ઠેર-ઠેર કચરાના ઢગલા જોવા મળે છે. 
શૌચાલયની સ્થિતિ એટલી ખરાબ છે કે તે કચરાના ગોડાઉન જેવું લાગે છે. તલાટી-કમ-મંત્રી નિયમિત રીતે કચેરીમાં આવે છે, પરંતુ સ્વચ્છતા પ્રત્યે કોઈ ધ્યાન આપવામાં આવતું નથી. તાલુકા વિકાસ અધિકારી દ્વારા આ ગામની મુલાકાત લેવામાં આવી નથી. અરજદારોને પોતાના કામકાજ માટે આ કચેરીની મુલાકાત લેવી પડે છે, પરંતુ કચેરીની સ્થિતિ ડમ્પિંગ યાર્ડ જેવી છે. ગામમાં સફાઇ અભિયાન માત્ર કાગળ પર જ સીમિત રહ્યું છે. 
પંચાયત કચેરીમાં સફાઈ કર્મચારી અને પ્યૂનની નિમણૂક ન થવાને કારણે આ દુર્દશા સર્જાઈ છે. સ્વચ્છતા અભિયાનના નામે કરોડો રૂપિયા ખર્ચવામાં આવે છે, પરંતુ આ કચેરીની સ્થિતિ સરકારી તંત્રની નિષ્ક્રિયતા દર્શાવે છે.