યુનિવર્સિટી પોલીસ સ્ટેશનના સ્ટાફે દારૂના ગુનામાં નાસતા ફરતા બે આરોપીઓને રૈયા ગામ પાસેથી ઝડપી લઇ કાયદેસરની કાર્યવાહી કરી હતી. બંને આરોપીઓ પૈકી એક આરોપી સામે હત્યા સહિતના પાંચ ગુના નોંધાઈ ચૂક્યા છે.

યુનિવર્સિટી પોલીસ મથકના પીઆઇ એચ.એન. પટેલની રાહબરી હેઠળ પી.એસ.આઇ વી.જી. ડોડીયા તથા તેમની ટીમ પેટ્રોલિંગમાં હતી. દરમિયાન હેડ કોન્સ્ટેબલ વીરદેવસિંહ જાડેજા, પ્રતાપસિંહ મોયા અને વિજુભા જાડેજાને મળેલી બાતમીના આધારે દારૂના ગુનામાં નાસતા ફરતા આરોપી સેજાદ ઉર્ફે નવાબ સુલતાનભાઈ જલવાણી (રહે. મોચી નગર બે, મસ્જિદવાળી શેરી, શીતલ પાર્ક મેઇન રોડ) અને અયાન દિલાવરભાઈ અજલાણી (રહે. પીઠડીયા તા. જેતપુર) ને રૈયા ગામ પાસેથી ઝડપી લીધા હતા.

પોલીસે જણાવ્યું હતું કે, આરોપી સામે યુનિવર્સિટી પોલીસ સ્ટેશનમાં દારૂનો ગુનો નોંધાયા બાદ બંને નાસતા ફરતા હતા. આરોપી સેજાદ ઉર્ફે નવાબ સામે અગાઉ ગાંધીગ્રામ પોલીસ સ્ટેશનમાં હત્યા, યુનિવર્સિટીમાં મારામારી- એટ્રોસિટી, યુનિવર્સિટી પોલીસ સ્ટેશનમાં દારૂ, ડીસીબીમાં દારૂ સહિતના કુલ પાંચ ગુના નોંધાઈ ચૂક્યા છે.

દારૂના ગુનામાં ફરાર કુખ્યાત બુટલેગર પ્રશાંત ઉર્ફે પસીયો ઝડપાયો

નાસતા ફરતા સ્કોવર્ડના પીએસઆઇ આર.આર.કોઠીયા તથા ટીમે ક્રાઈમ બ્રાન્ચમાં નોંધાયેલા દારૂના ગુનામાં ફરાર કુખ્યાત બુટલેગર પ્રશાંત ઉર્ફે પસીયો કિશોરભાઈ પરમાર (ઉ.વ 30 રહે. લક્ષ્મીવાડી ક્વાર્ટર નંબર 60, ભક્તિનગર સર્કલ પાસે) ને ઝડપી લીધો હતો. આરોપી સામે અગાઉ ડીસીબી, ભક્તિનગર, બી ડિવિઝન, ગાંધીગ્રામ, યુનિવર્સિટી, એ ડિવિઝન, પ્ર.નગર અને ભાડલા પોલીસ સ્ટેશનમાં દારૂ સહિતના 14 ગુના નોંધાઈ ચૂક્યા છે. આ કામગીરીમાં સ્કોવર્ડના હેડ કોન્સ્ટેબલ ધર્મેન્દ્રસિંહ ઝાલા, અંકિતભાઈ નિમાવત, અનિલભાઈ જીલરીયા, કોન્સ્ટેબલ અમીનભાઈ ભલુર, પ્રશાંતભાઈ ગજેરા સાથે રહ્યા હતા.