ગ્રીનલેન્ડ ચોકડીથી આજીડેમ ચોકડી તરફ આવતા બુટલેગરે પોલીસને જોઈ દારૂ ભરેલ કાર હંકારી મૂકી હતી.દરમિયાન અકસ્માત થતાં બુટલેગર કાર આજી જીઆઇડીસી પાસે રેઢી મૂકી નાસી છૂટ્યો હતો. પોલીસે ફિલ્મી સ્ટાઇલે કારનો પીછો કરી ૩૬ બોટલ દારૂ સાથે રૂ.૪.૧૮ લાખનો મુદામાલ કબજે કરી કાર રેઢી મુકી નાસી ગયેલા રાહુલ નામના શખસને ઝડપ લેવા તપાસ હાથ ધરી છે.

જાણવા મળતી વિગતો મુબજ, આજીડેમ પોલીસ મથકના પીઆઈ એ.બી.જાડેજાની રાહબરીમાં ટીમ પેટ્રોલિંગમાં હતી દરમિયાન એએસઆઈ રવી વાંક,હારૂનભાઇ ચાનીયા, કોન્સ્ટેબલ જગદીશસિંહ પરમાર અને મહેશ કોઠીવાળને ગ્રીનલેન્ડ ચોકડીથી આજીડેમ ચોકડી તરફ એક સિલ્વર કલરની સ્વીફ્ટ કાર નં.GJ-03-NF-9390 લઈ રાહુલ ભરત ભેંસજાળીયા નામનો શખસ નીકળવાનો છે, તેવી ચોક્કસ બાતમીના આધારે આજી જીઆઇડીસી પાસે ટીમ વોચમાં હતી. દરમિયાન નીકળેલ સ્વીફટ કાર રોકવાનો પ્રયાસ કરતા કાર ચાલક કાર લઈ નાશી જતા સ્ટાફે કારનો પીછો કરતા કાર ચાલક પોતાની કાર પુરઝડપે ચલાવી ખોખડદળ પુલ નીચેથી આજીડેમ ચોકડી તરફ જવાના સર્વિસ રોડ ઉપર અજય વે બ્રીજ પાસે પોતાની કારનો કાબુ ગુમાવતા અન્ય વાહન સાથે પોતાની કાર અથડાતા કાર પાવરટેક નામના કારખાના સામે રેઢી મૂકી નાસી ગયો હતો.

જે બાદ પહોંચેલી પોલીસે કારની તપાસ કરતા પાછળની સીટમાં વિદેશી દારૂની ૩૬ બોટલ મળી આવતાં પોલીસે દારૂ અને કાર મળી કુલ રૂ.૪.૧૮ લાખનો મુદામાલ કબ્જે કરી કાર ચાલક રાહુલ ભરતભાઇ ભેસજાળીયા નામના આ શખસની શોધખોળ શરૂ કરી છે.