અમેરિકાના રાષ્ટ્રપતિ ડોનાલ્ડ ટ્રમ્પે આજે ઈરાનને ચેતવણી આપી હતી કે, "જો ઈરાન કોઈપણ સ્વરૂપમાં, કોઈપણ રીતે અમારા પર હુમલો કરશે, તો અમેરિકાના સશસ્ત્ર દળોની સંપૂર્ણ તાકાત અને શક્તિ તમારા પર પહેલા ક્યારેય ન હોય તેવી રીતે ત્રાટકશે."

ટ્રમ્પનું આ નિવેદન શનિવારે ઈઝરાયલે તેહરાનમાં ઈરાનના સંરક્ષણ મંત્રાલયના મુખ્યાલયને નિશાન બનાવ્યા અને ઈરાનના બુશેહર પ્રાંતમાં દક્ષિણ પાર્સ ગેસ ક્ષેત્ર સાથે જોડાયેલા કુદરતી ગેસ પ્રોસેસિંગ યુનિટ પર હુમલો કર્યા બાદ આવ્યું છે.

ટ્રમ્પે સોદો કર્યો હોવાનો દાવો કર્યો છે

યુએસએ ઈરાન પર ઈઝરાયલના રાતોરાત હુમલામાં કોઈપણ ભૂમિકાનો ઇનકાર કર્યો છે. આ સાથે, ડોનાલ્ડ ટ્રમ્પે દાવો કર્યો હતો કે તેઓ 'ઈરાન અને ઈઝરાયલ વચ્ચે સરળતાથી સોદો કરી શકે છે અને આ સંઘર્ષનો અંત લાવી શકે છે.' રવિવારે, ઈરાને તેહરાન અને વોશિંગ્ટન ડીસી વચ્ચે છઠ્ઠા રાઉન્ડની પરમાણુ વાટાઘાટો રદ કરી દીધી. આજે સવારે ઈઝરાયલના દરિયાકાંઠાના શહેર બાટ યામમાં ઈરાનના મિસાઈલ હુમલામાં ઓછામાં ઓછા ચાર લોકો માર્યા ગયા અને 100 થી વધુ ઘાયલ થયા. શહેરના મેયરે આ માહિતી આપી. ઘટનાસ્થળે રાહત અને બચાવ કામગીરી ચાલી રહી છે.

ઈરાની હુમલામાં સાત લોકોના મોત

ઈરાનના હુમલા શનિવારે શરૂ થયા હતા, જે આખી રાત અને રવિવાર સવાર સુધી ચાલુ રહ્યા. ઈઝરાયલની એમ્બ્યુલન્સ સેવા અનુસાર, દેશભરમાં આ હુમલાઓમાં ઓછામાં ઓછા સાત લોકોના મોત થયા છે, જેમાં એક 10 વર્ષનો બાળક અને 20 વર્ષની મહિલાનો સમાવેશ થાય છે. 140 થી વધુ લોકો ઘાયલ થયા હોવાના અહેવાલ છે. રાતોરાત કેટલી ઇમારતો પર હુમલો કરવામાં આવ્યો તેની હજુ સુધી પુષ્ટિ થઈ નથી.