નેશનલ પેમેન્ટ્સ કોર્પોરેશન ઓફ ઇન્ડિયા (NPCI) UPI પેમેન્ટ્સ સંબંધિત નિયમોમાં ફેરફાર કરવા જઈ રહ્યું છે. નવા નિયમો ૧ ઓગસ્ટ, ૨૦૨૫થી લાગુ પડશે. ચાલો તમને જણાવીએ કે આ અંગે શું માર્ગદર્શિકા છે અને તેની તમારા પર શું અસર પડશે?

નેશનલ પેમેન્ટ્સ કોર્પોરેશન ઓફ ઇન્ડિયા (NPCI) ૧ ઓગસ્ટ, ૨૦૨૫થી UPIમાં નવા API નિયમો લાગુ કરવા જઈ રહ્યું છે. આ ફેરફારોથી UPI યુઝર્સની ઘણી સુવિધાઓ મર્યાદિત થઈ જશે. NPCIએ બેંકો અને Paytm, PhonePe જેવા પેમેન્ટ સર્વિસ પ્રોવાઇડર્સને નવી સેવાઓ અંગે માર્ગદર્શિકા જારી કરી છે. તેની અસર બેલેન્સ ચેક, ઓટોપે અને ટ્રાન્ઝેક્શન સ્ટેટસ ચેક જેવી સેવાઓ પર પડશે. ચાલો જાણીએ કે ૧ ઓગસ્ટ, ૨૦૨૫ પછી શું-શું બદલાઈ જશે અને યુઝર્સ શું નહીં કરી શકે.

બેલેન્સની માહિતી
યુઝર્સ હવે એક દિવસમાં કોઈ એક UPI એપથી ફક્ત ૫૦ વાર જ બેલેન્સ ચેક કરી શકશે. જો તમે બે એપ્સનો ઉપયોગ કરો છો, તો બંનેમાં અલગ-અલગ ૫૦ વાર ચેક કરી શકો છો. આનાથી વધુ વાર તમે બેલેન્સની માહિતી લઈ શકશો નહીં.

ઓટોપે પેમેન્ટ્સનો સમય પ્રતિબંધ
ઓટોપે મેન્ડેટ્સ હવે પીક અવર્સ એટલે કે સવારે ૧૦ થી બપોરે ૧ અને સાંજે ૫ થી રાત્રે ૯:૩૦ દરમિયાન થઈ શકશે નહીં. આ પેમેન્ટ્સ ફક્ત નોન-પીક અવર્સમાં જ પ્રોસેસ થશે, જેનાથી ઓટોપે શેડ્યૂલમાં વિલંબ થઈ શકે છે.

ટ્રાન્ઝેક્શન સ્ટેટસ ચેક
જો કોઈ ટ્રાન્ઝેક્શન અમુક ખાસ એરર કોડ્સ જેમ કે નેટવર્ક ઇશ્યૂના કારણે નિષ્ફળ જાય છે, તો વારંવાર સ્ટેટસ ચેક કરવાની API કોલ્સ બંધ થઈ જશે. યુઝર્સને તરત જ ખબર નહીં પડે કે પેમેન્ટ સફળ થયું કે નહીં.

લિસ્ટ એકાઉન્ટની વિગત
યુઝર્સ પોતાના મોબાઈલ નંબરથી લિન્ક્ડ એકાઉન્ટ્સની લિસ્ટ એક એપથી એક દિવસમાં ફક્ત ૨૫ વાર જ ચેક કરી શકશે. આ રિક્વેસ્ટ ત્યારે જ કામ કરશે, જ્યારે યુઝર બેંક પસંદ કરશે અને તેની સંમતિ હશે.

NPCIએ બેંકો અને PSPs (પેમેન્ટ સર્વિસ પ્રોવાઇડર્સ)ને આદેશ આપ્યો છે કે તેઓ APIના ઉપયોગ પર નજર રાખે. જો નિયમોનું પાલન નહીં થાય, તો API રિસ્ટ્રિક્શન્સ, પેનલ્ટી અથવા નવા કસ્ટમર્સ જોડવા પર રોક લાગી શકે છે. તમામ PSPsએ ૩૧ ઓગસ્ટ, ૨૦૨૫ સુધી સિસ્ટમ ઓડિટનું અન્ડરટેકિંગ આપવું પડશે. આ ફેરફારોથી યુઝર્સને વારંવાર બેલેન્સ ચેક, ઓટોપે સેટઅપ અથવા સ્ટેટસ ચેક કરવામાં મુશ્કેલી પડશે. NPCIનું કહેવું છે કે આ નિયમો સિસ્ટમને સરળ અને સુરક્ષિત બનાવવા માટે કરવામાં આવી રહ્યા છે.