દુનિયામાં ઘણા પ્રકારના ગેમ શો છે, જેમાંથી કેટલાક ખૂબ જ ફની હોય છે તો કેટલાક ખતરનાક પણ હોય છે. જો કે, આ રમત જેટલી ખતરનાક છે, તેટલું જ તેનો પુરસ્કાર પણ વધારે હોય છે. એક પ્રખ્યાત યુટ્યુબર પણ આવા જ એક ગેમ શોને હોસ્ટ કરવા જઈ રહ્યો છે, જેની ઈનામી રકમ તમારા હોશ ઉડાવી દેશે. આ યુટ્યુબરનું નામ મીસ્ટર બિસ્ટ છે. તેણે જાહેરાત કરી છે કે તે 'ઈતિહાસનો સૌથી મોટો ગેમ શો' હોસ્ટ કરવા જઈ રહ્યો છે, જેની ઈનામની રકમ 5 મિલિયન ડોલર એટલે કે 41 કરોડ રૂપિયાથી વધુ રાખવામાં આવી છે. આ જાહેરાતે ઇન્ટરનેટ પર હલચલ મચાવી દીધી છે.

તેણે સોશિયલ મીડિયા પ્લેટફોર્મ ટ્વિટર પર એક પોસ્ટ શેર કરી છે, જેમાં તેણે લોકોને રમતમાં ભાગ લેવા અને રજીસ્ટ્રેશન કરવા માટે કહ્યું છે. પોસ્ટમાં લખ્યું છે કે, 'ઈતિહાસના સૌથી મોટા ગેમ શોમાં 5 મિલિયન ડોલર આપી રહ્યો છું. જો તમે બીસ્ટ ગેમ્સમાં ભાગ લેવા માંગતા હો, તો રજીસ્ટ્રેશન કરો, મારે 5 હજાર લોકોની જરૂર છે. આ પોસ્ટને અત્યાર સુધીમાં લાખો લાઈક્સ મળી છે, અને વિવિધ પ્રકારની પ્રતિક્રિયાઓ આપી છે.

 એક યુઝરે લખ્યું છે કે, 'હું અત્યારે ખૂબ જ દુઃખી છું. પોસ્ટ જોયા પછી, હું વેબસાઈટ પર ગયો અને પ્રથમ પેજની સંપૂર્ણ સૂચનાઓ વાંચી અને પછી વર્ણન લખવામાં કલાકો ગાળ્યા. આ પછી તેને યુટ્યુબ પર અપલોડ કરવામાં આવ્યું, હું હમણાં જ સબમિટ ક્લિક કરવા માટે સાઇટ પર પાછો ગયો અને જોયું કે તે ફક્ત યુ.એસ.ના લોકો માટે છે. આ યોગ્ય નથી.  તમે તેના વિશે પ્રથમ પૃષ્ઠ પર પણ કહી શક્યા હોત. મારો સમય અને શક્તિ બંને વેડફાઈ ગયા', જ્યારે અન્ય એક યુઝરે લખ્યું, 'શું તમે મને રમ્યા વિના 5 મિલિયન ડોલર મોકલી શકો છો?'

મીસ્ટર બિસ્ટની વેબસાઈટ અનુસાર, તેમની રમતમાં ભાગ લેવા માટે, વ્યક્તિની ઉંમર 18 વર્ષ કે તેથી વધુ હોવી જોઈએ અને વ્યક્તિનો પાસપોર્ટ 2025 સુધી માન્ય હોવો જોઈએ. તેમણે એ પણ સંકેત આપ્યો કે રમતો જૂનના અંતમાં શરૂ થઈ શકે છે અને સપ્ટેમ્બર સુધી ચાલશે. આ ઉપરાંત ગેમમાં ભાગ લેવા માટે બીજી શરત એ છે કે આ સ્પર્ધામાં માત્ર અમેરિકન નાગરિકો જ ભાગ લઈ શકે છે.