કુખે જન્મેલા જોડિયા બાળકોને જુવે એ પહેલા જ જનેતાએ હંમેશના માટે આંખ મીંચી લેતા જન્મતાની સાથે જ બે બાળકોએ મા નું વાત્સલ્ય ગુમાવ્યું છે.

કોઠારીયા સોલ્વન્ટમાં રહેતા 32 વર્ષીય પરિણીતાએ મિરેકલ હોસ્પિટલમાં દીકરા દીકરીને જન્મ આપ્યા બાદ તબિયત લથડતા નીચેની હોસ્પિટલમાં લઈ જવાતા સારવાર કારગત નીવડે પહેલા જ મોત નિપજતા પરિવારમાં કરુણ કલ્પાંત સર્જાયો છે.

બનાવની મળતી વિગત મુજબ શહેરના કોઠારીયા સોલવન્ટમાં રહેતા કિરણબેન ધર્મેશભાઈ વામજા (ઉ.વ.32)ના પરિણીતાને પ્રસુતિની પીડા ઉપડતા બાલાજી હોલ પાસે આવેલી મિરેકલ હોસ્પિટલમાં ખસેડવામાં આવતા ત્યાં તેમની સિઝેરિયન ડિલિવરી કરવામાં આવી હતી. કિરણબેનને દીકરા દીકરીને જન્મ આપ્યાના કલાકોમાં જ પોતાના ધબકારા ઘટવા લાગતા શ્વાસ લેવામાં તકલીફ શરૂ થઇ હતી. આથી તાકીદે નીચે આવી બીજી હોસ્પિટલમાં રીફર કરવામાં આવતા ચાલુ સારવાર દરમિયાન દમ તોડી દેતા પરિવારમાં ઘેરો કલ્પાંત સર્જાયો હતો. મૃતક કિરણબેનના પતિ ધર્મેશભાઈ ફાર્મસીનું કામ કરે છે. પ્રથમ ડિલિવરી દરમિયાન પરિણીતાનું મૃત્યુ થતા પરિવાર શોકમાં ગરકાવ થયો છે. આજીડેમ પોલીસે જરૂરી કાર્યવાહી કરી હતી.