ટેસ્લા અને સ્પેસએક્સના સીઈઓ ઈલોન મસ્કે ફરીથી યુએસ રાષ્ટ્રપતિ ડોનાલ્ડ ટ્રમ્પ દ્વારા રજૂ કરાયેલા ટેક્સ અને ખર્ચ સંબંધિત 'બિગ બ્યુટીફુલ બિલ' પર આકરા પ્રહારો કર્યા છે. આ બિલને 'અમેરિકાને નાદાર બનાવનાર' ગણાવતા, મસ્કે તેમના 20 કરોડથી વધુ અનુયાયીઓને સાંસદોને ફોન કરીને બિલનો વિરોધ કરવા અપીલ કરી છે.મસ્કએ તેમના સોશિયલ મીડિયા પ્લેટફોર્મ X પર લખ્યું કે તમારા સેનેટર અને સાંસદને બોલાવો. અમેરિકાને નાદાર બનાવવું યોગ્ય નથી. કિલ ધ બિલ. તેમણે આ બિલને બજેટ ખાધ વધારવા અને આર્થિક શિસ્ત સાથે દગો આપનાર ગણાવ્યું છે.

ઈલોન મસ્ક સરકારી વિભાગ 'ડિપાર્ટમેન્ટ ઓફ ગવર્નમેન્ટ એફિશિયન્સી' ના વડા રહ્યા છે, જોકે હવે આ વિભાગ નાબૂદ કરવામાં આવ્યો છે. તેથી, મસ્ક હવે આ બિલ સામે પોતાની બધી તાકાત એકઠી કરી રહ્યા છે. તેમણે કહ્યું કે મોટા ખર્ચવાળા આ બિલો અમેરિકાનો નાશ કરી રહ્યા છે. હવે બહુ થયું. મસ્ક દલીલ કરે છે કે આ બિલ અમેરિકાના દેવામાં વધુ 5 ટ્રિલિયન ડોલરનો વધારો કરશે, અને આ દેશને ઝડપથી મોટી ખાધ તરફ દોરી જશે.

રિપબ્લિકન નેતાઓની પ્રતિક્રિયા

જોકે, કોંગ્રેસના કેટલાક ટોચના રિપબ્લિકન નેતાઓએ એલોન મસ્કની ટીકાને નકારી કાઢી. વ્હાઇટ હાઉસના એક અધિકારીએ મસ્કની ટિપ્પણીઓને ગુસ્સે કરનારી ગણાવી. સેનેટર કેવિન ક્રેમર (નોર્થ ડાકોટા) એ કહ્યું, "મને નથી લાગતું કે ઘણા સેનેટરોને એલોન જે કહે છે તેમાં રસ છે. તે રમુજી છે, પરંતુ આપણે ગંભીર નીતિ નિર્માતા છીએ, આપણે વાસ્તવિકતાનો સામનો કરવો પડશે.

ટેસ્લા પર અસર

આ બિલ ટેસ્લાને ફાયદો કરાવતી કેટલીક સબસિડીઓ દૂર કરવાની વાત કરે છે, જેના કારણે મસ્કનો વિરોધ વધુ તીવ્ર બન્યો છે. તેમણે ટ્રમ્પના બિલને 'ઘૃણાસ્પદ અને કૌભાંડોથી ભરેલું' ગણાવ્યું. મસ્કે કહ્યું, "માફ કરશો, પણ હું હવે તેને સહન કરી શકતો નથી. ખર્ચાઓથી ભરેલું આ બિલ શરમજનક છે. જેમણે તેને મત આપ્યો છે તેમને તેમના કાર્યોથી શરમ આવવી જોઈએ.