બુટલેગરો ફરાર

મીઠાપુર નજીક આવેલા સુરજકરાડી ગામે રહેતા ધવલ અશોકભાઈ અરીલા નામના શખ્સ દ્વારા ગાંધી નિવાસની પાછળ આવેલા એક ખંઢેર જેવા બંધ મકાનમાં ગેરકાયદેસર રીતે છુપાવીને રાખવામાં આવેલી રૂપિયા 56,950 ની કિંમતની 82 બોટલ પરપ્રાંતિય શરાબ તેમજ રૂપિયા 33,265 ની કિંમતમાં 291 નંગ દારૂના ચપલા પોલીસને મળી આવ્યા હતા.

આ પ્રકરણમાં આરોપી પોલીસને હાથ ન લાગતાં પોલીસે કુલ રૂપિયા 90,215 ની કિંમતનો દારૂ કબજે કરી, આરોપીની શોધખોળ હાથ ધરી છે.

અન્ય એક કાર્યવાહીમાં કલ્યાણપુર વિસ્તારમાં સ્થાનિક પી.એસ.આઈ. યુ.બી. અખેડની સૂચનાથી પી.એસ.આઈ. કે.પી. ઝાલા તેમજ સ્ટાફ દ્વારા શનિવારે રાત્રિના સમયે હાથ ધરવામાં આવેલા પેટ્રોલિંગ દરમિયાન કલ્યાણપુરથી આશરે 34 કિલોમીટર દૂર ભાટવડીયા ગામના વાડી વિસ્તારમાં રહેતા દિલીપ શામજી રાઠોડ દ્વારા પોતાના કબજા ભોગવટાની વાડીમાં છુપાવીને રાખવામાં આવેલી વિદેશી દારૂની 107 બોટલ પોલીસે કબજે કરી હતી.

આ પ્રકરણમાં પોલીસે રૂપિયા 75,676 ની કિંમતનો પરપ્રાંતીય શરાબનો જથ્થો કબજે લઈ, હાલ ફરાર થઈ ગયેલા આરોપી દિલીપ રાઠોડને ઝડપી લેવા માટેના ચક્રો ગતિમાન કર્યા છે.