બોલિવૂડના ખિલાડી એટલે કે અક્ષય કુમાર તેની નવી ફિલ્મ 'બડે મિયાં છોટે મિયાં'ને લઈને ચર્ચામાં છે. જેમાં તેની સાથે ટાઈગર શ્રોફ પણ એક્શન અવતારમાં જોવા મળશે. હવે અક્ષય કુમારે ફિલ્મનું લેટેસ્ટ પોસ્ટર શેર કર્યું છે. જેમાં તે હાથમાં બંદૂક પકડીને એક્શન મોડમાં જોવા મળી રહ્યો છે. આ સાથે તેણે ખુલાસો કર્યો કે તેની ફિલ્મ 'બડે મિયાં છોટે મિયાં'નું ટીઝર કયા દિવસે રિલીઝ થવાનું છે.

જીહા, ખિલાડી અક્ષય કુમારે સોશિયલ મીડિયા પર તેની ફિલ્મ 'બડે મિયાં છોટે મિયાં'ના પોસ્ટરની ઝલક બતાવી છે. જેમાં અક્ષય કુમારની સાથે ટાઈગર શ્રોફ પણ જોરદાર લુકમાં જોવા મળી રહ્યો છે. પોસ્ટરમાં અક્ષય કુમાર બ્લેક ટી-શર્ટ પર બુલેટપ્રૂફ જેકેટ પહેરેલો જોવા મળે છે. તેના બંને હાથમાં બે મોટી બંદૂકો છે. જ્યારે કે ટાઇગર શ્રોફે એક્શન મોડ સાથે હાથમાં બંદૂક પકડેલી જોવા મળે છે. એ પોસ્ટર પરથી અંદાજ લગાવવામાં આવે છે કે 'બડે મિયાં છોટે મિયાં'માં એક્શનનો ડબલ ડોઝ જોવા મળી શકે છે.

આપને જણાવી દઇએ કે, 'બડે મિયાં છોટે મિયાં'નું પોસ્ટર શેર કરતી વખતે અક્ષય કુમારે કેપ્શનમાં લખ્યું હતું કે, 'અમે અમારું મનપસંદ કામ એટલે કે મોટા પડદા પર એક્શન કરવા માટે તૈયાર છીએ. આ સાથે અક્ષય કુમારે જણાવ્યું કે તેની ફિલ્મનું ટીઝર 24 જાન્યુઆરીએ રિલીઝ થશે અને ફિલ્મ ઈદના અવસર પર સિનેમાઘરોમાં આવશે. ફિલ્મ ‘બડે મિયાં છોટે મિયાં’ની જાહેરાત ગત વર્ષે મે મહિનામાં કરવામાં આવી હતી. આ સાથે જ એક વિડીયો પણ જાહેર કરવામાં આવ્યો હતો કે જેમાં અક્ષય કુમાર અને ટાઈગર શ્રોફ દમદાર એક્શન કરતા જોવા મળ્યા.

ફિલ્મ 'બડે મિયાં છોટે મિયાં'નું શૂટિંગ દેશમાં તો કરવામાં આવ્યું છે આ ઉપરાંત વિદેશમાં પણ શૂટિંગ કરાયું છે. સ્કોટલેન્ડ, લંડન અને યુએઇ સહિતના દેશોમાં આ ફિલ્મનું શૂટિંગ કરવામાં આવ્યું છે. આ ફિલ્મના દિગ્દર્શક અલી અબ્બાસ ઝફર છે. જે અગાઉ 'ટાઈગર ઝિંદા હૈ' અને 'સુલતાન' જેવી સફળ ફિલ્મોનું નિર્દેશન કરી ચૂક્યા છે. ત્યારે હાલ તો ખિલાડી અક્ષય કુમાર અને ટાઇગર શ્રોફના એક્શન અવતારને જોવા માટે ફિલ્મ 'બડે મિયાં છોટે મિયાં'ની રાહ જોવામાં આવી રહી છે.