માલદીવ્સના પ્રવાસન ઉદ્યોગને ફરીથી વેગ આપવા અને ખાસ કરીને ભારતીય પ્રવાસીઓને આકર્ષવા માટે એક મોટો નિર્ણય લેવામાં આવ્યો છે. બોલિવૂડની પ્રખ્યાત અભિનેત્રી કેટરિના કૈફ ને માલદીવ્સના ગ્લોબલ ટુરિઝમ એમ્બેસેડર તરીકે નિયુક્ત કરવામાં આવી છે.

​​​​​​​આ નિર્ણય ' #BoycottMaldives ' ટ્રેન્ડ બાદ લેવામાં આવ્યો છે, જેના કારણે માલદીવ્સમાં ભારતીય પ્રવાસીઓની સંખ્યામાં લગભગ 40% જેટલો ઘટાડો નોંધાયો હતો. ભૂતકાળમાં રાજદ્વારી સંબંધોમાં ઉદ્ભવેલા તણાવને કારણે આ બોયકોટ અભિયાન શરૂ થયું હતું, જેની સીધી અસર માલદીવ્સના અર્થતંત્ર પર પડી હતી.

કેટરિના કૈફ એક લોકપ્રિય અને પ્રભાવશાળી વ્યક્તિત્વ ધરાવે છે, અને તેમની નિમણૂકથી માલદીવ્સ ભારતીય બજારમાં પોતાની છબી સુધારવાનો પ્રયાસ કરી રહ્યું છે. માલદીવ્સ સરકાર અને પ્રવાસન વિભાગને આશા છે કે, કેટરિના કૈફની લોકપ્રિયતા ભારતીય પ્રવાસીઓને ફરીથી માલદીવ્સ તરફ આકર્ષિત કરશે અને પ્રવાસન ઉદ્યોગને પુનર્જીવિત કરવામાં મદદ કરશે. આગામી સમયમાં કેટરિના કૈફ માલદીવ્સના પ્રવાસનને પ્રોત્સાહન આપતી વિવિધ જાહેરાતો અને પ્રચાર ઝુંબેશમાં ભાગ લેતી જોવા મળશે.