ભારતના અનુભવી ઓલરાઉન્ડર રવિચંદ્રન અશ્વિન આંતરરાષ્ટ્રીય ક્રિકેટમાંથી નિવૃત્તિની જાહેરાત કર્યા પછી ક્રિકેટના મેદાન પર સારો સમય નથી પસાર કરી રહ્યો. IPLમાં ચેન્નઈ સુપર કિંગ્સ માટે બેટ અને બોલ બંને સાથે સામાન્ય પ્રદર્શન કરનાર અશ્વિનને કથિત રીતે રવિવારે કોઈમ્બતુરના શ્રી રામકૃષ્ણ કોલેજ ઓફ આર્ટ્સ એન્ડ સાયન્સ ક્રિકેટ ગ્રાઉન્ડ ખાતે ડિંડીગુલ ડ્રેગન્સ અને તિરુપુર તમિઝાન્સ વચ્ચે તમિલનાડુ પ્રીમિયર લીગ મેચ દરમિયાન આચારસંહિતાનું ઉલ્લંઘન કરવા બદલ દંડ ફટકારવામાં આવ્યો છે.

ડિંડીગુલના કેપ્ટન અશ્વિનન પર મેચ રેફરી અર્જુન કૃપાલ સિંહે બે ગુનામાં દોષિત ઠેરવ્યા બાદ તેની મેચ ફીના 30% દંડ ફટકાર્યો છે. અશ્વિનને અમ્પાયરો પ્રત્યે અસંમતિ દર્શાવવા અને સાધનોના દુરુપયોગ માટે દોષી ઠેરવવામાં આવ્યો છે. તમિલનાડુ પ્રીમિયર લીગના એક અધિકારીએ જણાવ્યું કે, મેચ બાદ મેચ રેફરીએ સુનાવણી કરી હતી. અશ્વિન પર અમ્પાયરો પ્રત્યે અસંમતિ દર્શાવવા બદલ 10% અને સાધનોના દુરુપયોગ માટે 20% દંડ ફટકારવામાં આવ્યો છે. તેણે દંડ સ્વીકારી લીધો છે.

પાંચમી ઓવરના છેલ્લા બોલ પર તિરુપુર તમિઝાન્સના આર સાઈ કિશોર દ્વારા એલબીડબ્લ્યુ આઉટ આપ્યા બાદ અશ્વિન અમ્પાયર સાથે ઉગ્ર દલીલ કરતો જોવા મળ્યો. સાઈ કિશોરે પેડ પર એક બોલ ફેંક્યો, જેનાથી અશ્વિનને મોટો શોટ રમવાની તક મળી. પરંતુ મોટો સ્વીપ કરવામાં નિષ્ફળ ગયો. બોલ લેગ સ્ટમ્પની બહાર જતો હોય તેવું લાગતું હતું, પરંતુ અમ્પાયરે આંગળી ઉંચી કરી, જેનાથી અશ્વિન ખૂબ જ નિરાશ થયો.

અશ્વિન ડીઆરએસનો ઉપયોગ કરી શક્યો નહીં કારણ કે ડિંડીગુલ પહેલાથી જ ડીઆરએસનો ઉપયોગ કરી ચૂકી હતી. 38 વર્ષીય ખેલાડી અમ્પાયર પાસે ગયો અને થોડા શબ્દો બોલ્યા. તેણે અમ્પાયરો પાસેથી સ્પષ્ટતા માંગવાનું ચાલુ રાખ્યું, જેમણે જવાબ આપવાનું જરૂરી ન માન્યું.

આ ઘટનાથી ગુસ્સે થઈને અશ્વિન મેદાનની બહાર જતો રહ્યો. પવેલિયન તરફ જતી વખતે તેણે પોતાનું બેટ તેના પેડ પર પછાડ્યું અને ડગઆઉટથી કેટલીક ઈંચ દૂર હવામાં ગ્લવ્સ ફેંકી દીધા. તે આટલામાં જ ન અટક્યો તેણે ડગઆઉટમાંથી અમ્પાયરો પર બૂમો પાડવાનું ચાલુ રાખ્યું. તેનું શરીર અને હાથના હાવભાવ એટલા જ આક્રમક હતા જેટલા હોઈ શકે છે.

અશ્વિને 11 બોલમાં બે ચોગ્ગા અને એક છગ્ગાની મદદથી 18 રન બનાવીને ડિંડીગુલ ડ્રેગન્સને ઝડપી શરૂઆત અપાવી હતી. પરંતુ પાંચમી ઓવરમાં 39/1 પર તેના આઉટ થવાથી નાટકીય પતન શરૂ થયું, કારણ કે ડિંડિગુલે પોતાની બાકીની 9 વિકેટ માત્ર 54 રનમાં ગુમાવી દીધી અને 16.2 ઓવરમાં 93 રનમાં ઓલઆઉટ થઈ ગઈ.