ટી20 ક્રિકેટમાં સૌથી ઝડપી સદીનો ક્રિસ ગેલનો રેકોર્ડ તૂટી ગયો છે. જાણો ભારતીય મૂળના કયા ખેલાડીએ આ રેકોર્ડ પોતાના નામે કર્યો છે.

ટી-20 ક્રિકેટમાં તોફાની રીતે સદી બેટ્સમેનો ફટકારી રહ્યા છે. અત્યાર સુધી વ્યાવસાયિક T20 ક્રિકેટમાં સૌથી ઝડપી સદી ફટકારવાનો રેકોર્ડ ક્રિસ ગેલના નામે હતો, જેણે IPL 2013માં રોયલ ચેલેન્જર્સ બેંગ્લોર (RCB) તરફથી રમતા માત્ર 30 બોલમાં સદી પૂરી કરી હતી. હવે એસ્ટોનિયા તરફથી રમતા ભારતીય મૂળના ખેલાડી સાહિલ ચૌહાણે માત્ર 27 બોલમાં સદી પૂરી કરીને ઈતિહાસ રચી દીધો છે. આ દિવસોમાં એસ્ટોનિયા સાયપ્રસના પ્રવાસે છે, જ્યાં બંને ટીમો વચ્ચે 6 T20 મેચ રમવાની છે. અત્યાર સુધી એસ્ટોનિયાએ શ્રેણીની બંને મેચ જીતી છે.

ક્રિસ ગેઈલનો રેકોર્ડ તોડ્યો

ક્રિસ ગેઈલે ટી20 ક્રિકેટમાં 30 બોલમાં સદી ફટકારી છે. હવે 17 જૂને ટી20 સિરીઝની બીજી મેચ એસ્ટોનિયા અને સાયપ્રસ વચ્ચે રમાઈ હતી. આ મુકાબલામાં યજમાન સાયપ્રસે પ્રથમ બેટિંગ કરતા 20 ઓવરમાં 7 વિકેટ ગુમાવીને 191 રન બનાવ્યા હતા. જેના જવાબમાં એસ્ટોનિયાની પ્રથમ 2 વિકેટ માત્ર 9 રનમાં પડી ગઈ હતી. ત્યારબાદ સાહિલ ચૌહાણ બેટિંગ કરવા માટે ક્રીઝ પર આવ્યો હતો. તેણે આવતાની સાથે જ ચોગ્ગા અને છગ્ગાનો વરસાદ શરૂ કરી દીધો. ચૌહાણે માત્ર 27 બોલમાં પોતાની સદી પૂરી કરી હતી અને સમગ્ર મેચમાં તેમણે 41 બોલમાં 144 રનની તોફાની ઇનિંગ રમી હતી. 144 રન બનાવતી વખતે તેણે 18 છગ્ગા અને 6 ચોગ્ગા ફટકાર્યા હતા. અત્યાર સુધી આંતરરાષ્ટ્રીય T20 ક્રિકેટમાં સૌથી ઝડપી સદી ફટકારવાનો રેકોર્ડ નામિબિયાના જેન નિકોલના નામે હતો. તેણે 2024માં નેપાળ સામેની મેચમાં 33 બોલમાં પોતાની સદી પૂરી કરી હતી.