જામનગર જિલ્લાના ધ્રોળ તાલુકાના હમાપર ગામમાં રહેતી અલ્પાબેન નિર્મળભાઈ કાનગડ નામની ૩૦ વર્ષની પરણીતાએ ગઈકાલે પોતાના ઘેર રહસ્યમય સંજોગોમાં પંખા ના હુકમાં દોરી બાંધી ગળાફાંસો ખાઈ લીધો હતો.

જેથી પરિવાર જનો દ્વારા તેણીને નીચે ઉતારી લઈ બેશુદ્ધ અવસ્થામાં ધ્રોળની સરકારી હોસ્પિટલમાં લઈ જવાઈ હતી, જયાં ફરજ પરના તબીબે તેણીનું મૃત્યુ નીપજ્યું હોવાનું જાહેર કર્યું હતું.

 આ બનાવ અંગે મૃતકના સંબંધી ધ્રોલમાં રહેતા ભોલાભાઈ ઉર્ફે ભાવેશભાઈ જશાભાઇ રાઠોડએ પોલીસને જાણ કરતાં ધ્રોલના પોલીસ હેડ કોન્સ્ટેબલ ડી.પી. વઘોરા બનાવના સ્થળે અને ધ્રોળની સરકારી હોસ્પિટલમાં પહોંચી ગયા હતા, અને અલ્પાબેનના મૃતદેહ નો કબજો સંભાળી પોસ્ટ મોર્ટમ કરાવ્યું છે, જ્યારે સમગ્ર બનાવ અંગે ઊંડાણપૂર્વકની તપાસ શરૂ કરી છે. પોલીસ દ્વારા અલ્પાબેનના પરિવારજનો વગેરેના નિવેદનો નોંધવાનું શરૂ કર્યું છે.