ઇન્ડોનેશિયામાં આજે વહેલી સવારે ૬.૧ ની તીવ્રતાનો ભૂકંપ અનુભવાયો હતો . તેનું કેન્દ્ર સુલાવેસી ટાપુ રહ્યું હતું.કંપન અંગેની માહિતી આપતાં, યુનાઇટેડ સ્ટેટ્સ જીઓલોજિકલ સર્વેએ જણાવ્યું હતું કે આજે ઇન્ડોનેશિયાના ઉત્તર સુલાવેસી પ્રાંતના દરિયાકાંઠે 6.1 ની તીવ્રતાનો ભૂકંપ આવ્યો હતો. હાલમાં આ ભૂકંપથી થયેલા નુકસાન અંગે કોઈ માહિતી બહાર આવી નથી.કે સુનામીની પણ કોઈ ચેતવણી જારી કરવામાં આવી નથી.

ભૂકંપ સ્થાનિક સમય મુજબ સવારે 6:55 વાગ્યે 10 કિલોમીટર (6.2 માઇલ)ની ઊંડાઈએ આવ્યો હતો. ઇન્ડોનેશિયન હવામાન એજન્સીએ આ વાતની પુષ્ટિ કરી છે. આ ઉપરાંત, માહિતી આપતાં તેમણે કહ્યું કે ભૂકંપને કારણે સુનામીનો કોઈ ભય નથી.

ઇન્ડોનેશિયા એ પ્રશાંત મહાસાગરના "રિંગ ઓફ ફાયર" પર સ્થિત એક વિશાળ દ્વીપસમૂહ છે. આ એક અત્યંત સક્રિય ભૂકંપીય પટ્ટો છે, જ્યાં ટેક્ટોનિક પ્લેટો નિયમિતપણે અથડાય છે, જેના પરિણામે ભૂકંપ અને જ્વાળામુખી ફાટી નીકળે છે.

કોઈ મોટું નુકસાન ન થતા રાહત

તાજેતરના ભૂકંપથી દેશમાં કોઈ મોટું નુકસાન થયું નથી, પરંતુ ઇન્ડોનેશિયન અધિકારીઓ આ ઘટનાઓ પર સતત નજર રાખી રહ્યા છે. ભૂકંપગ્રસ્ત વિસ્તારોના રહેવાસીઓને સતર્ક રહેવા અને સ્થાનિક આપત્તિ વ્યવસ્થાપન અધિકારીઓ દ્વારા જારી કરાયેલ સલામતી સૂચનાઓનું પાલન કરવાની સૂચના આપવામાં આવી છે.

અહી અનુભવાયેલા ભૂકંપની તવારીખ

જાન્યુઆરી ૨૦૨૧માં સુલાવેસીમાં ૬.૨ ની તીવ્રતાનો ભૂકંપ આવ્યો, જેમાં ૧૦૦ થી વધુ લોકો માર્યા ગયા અને હજારો લોકો બેઘર થયા.

૨૦૧૮માં સુલાવેસીના પાલુમાં ૭.૫ ની તીવ્રતાનો ભૂકંપ અને સુનામી, જેમાં ૨,૨૦૦ થી વધુ લોકો માર્યા ગયા.

૨૦૦૪: આચેહ પ્રાંતમાં ૯.૧ ની તીવ્રતાના ભૂકંપથી સુનામી આવી, જેમાં ફક્ત ઇન્ડોનેશિયામાં જ ૧,૭૦,૦૦૦ થી વધુ લોકો માર્યા ગયા.