જેલમાં બંધ પાકિસ્તાનના ભૂતપૂર્વ વડાપ્રધાન ઇમરાન ખાનને મોટો ઝટકો લાગ્યો છે. પાકિસ્તાનની એક કોર્ટે અલ-કાદિર ટ્રસ્ટ કેસમાં ઇમરાન ખાનને ૧૪ વર્ષની જેલની સજા ફટકારી છે. આ કેસમાં ઇમરાનની પત્ની બુશરા બીબીને પણ 7 વર્ષની જેલની સજા ફટકારવામાં આવી છે. 

અલ-કાદિર યુનિવર્સિટી પ્રોજેક્ટ ટ્રસ્ટ સંબંધિત ભ્રષ્ટાચાર કેસમાં ઇમરાન અને તેની પત્નીને આ સજા ફટકારવામાં આવી છે. આ કેસમાં, ઇમરાન સત્તાના દુરુપયોગ માટે પણ દોષિત છે.

કોર્ટે ઇમરાન અને તેની પત્ની પર ૧૯ કરોડ પાઉન્ડનો દંડ પણ ફટકાર્યો છે. રાવલપિંડીની આદિયાલા જેલ કોર્ટે આ ચુકાદો આપ્યો છે. ઈમરાન ખાન ઓગસ્ટ 2023થી રાવલપિંડીની જેલમાં બંધ છે. 

આ કેસમાં, પાકિસ્તાની કોર્ટે ડિસેમ્બર 2024માં જ પોતાનો નિર્ણય અનામત રાખ્યો હતો. આજે ચુકાદો જાહેર થાય તે પહેલાં, તેને ત્રણ વખત મુલતવી રાખવામાં આવ્યો હતો. દરમિયાન, ચુકાદા પછી તરત જ બુશરા બીબીને કસ્ટડીમાં લેવામાં આવી હતી.