જેલમાં બંધ પાકિસ્તાનના ભૂતપૂર્વ વડા પ્રધાન ઇમરાન ખાન અંગે પહેલી વાર તેમના પુત્રોએ જાહેરમાં પોતાનું મૌન તોડ્યું છે. તેમણે પાકિસ્તાનની શાહબાઝ સરકારની ટીકા કરી, અદિયાલા જેલમાં તેમના પિતાની સ્થિતિને ‘અમાનવીય’ ગણાવી અને આંતરરાષ્ટ્રીય સમુદાયને હસ્તક્ષેપ માટે અપીલ કરી. જેમીમા ગોલ્ડસ્મિથ સાથેના લગ્નથી ઇમરાનને બે પુત્રો છે, સુલેમાન ખાન (28) અને કાસિમ ખાન (26). તે બ્રિટનમાં રહે છે અને પહેલી વાર ઇમરાન ખાન વિશે વાત કરી છે.

ઈમરાન ખાન ઓગસ્ટ 2023 થી જેલમાં છે. તેમને 190 મિલિયન પાઉન્ડના ભ્રષ્ટાચાર કેસમાં દોષિત ઠેરવવામાં આવ્યા છે અને 9 મે 2023 ના વિરોધ પ્રદર્શનના સંદર્ભમાં આતંકવાદ વિરોધી કાયદા હેઠળ અન્ય ઘણા આરોપોનો સામનો કરી રહ્યા છે. એક ઈન્ટરવ્યુમાં કાસિમ ખાને કહ્યું કે અમે દરેક કાનૂની માર્ગ અજમાવી ચૂક્યા છીએ, હવે બોલવા સિવાય કંઈ બચ્યું નથી. અમે દરેક કાનૂની માર્ગ અપનાવ્યો છે, બધું જ અજમાવ્યું છે પરંતુ હવે પરિસ્થિતિ વધુ ખરાબ થઈ રહી છે. તેથી જ અમે નક્કી કર્યું છે કે હવે જાહેરમાં આવીને બોલવું પડશે.

તેમણે આરોપ લગાવ્યો કે તેમના પિતાને જેલમાં મૂળભૂત માનવ અધિકારોથી વંચિત રાખવામાં આવી રહ્યા છે અને હવે એકમાત્ર રસ્તો આંતરરાષ્ટ્રીય દબાણ બનાવવાનો છે. બીજા પુત્ર સુલેમાન ખાને કહ્યું કે અમે બધા કાનૂની વિકલ્પો અજમાવી લીધા છે પરંતુ હવે બધું શાંત થઇ ગયું છે. આંતરરાષ્ટ્રીય મીડિયામાં પણ આ મુદ્દા પર મૌન છે. પુત્રોએ એમ પણ કહ્યું કે નવેમ્બર 2023 માં કોર્ટ દ્વારા તેમને દર અઠવાડિયે તેમના પિતા સાથે વાત કરવાની મંજૂરી આપવામાં આવી હતી પરંતુ આ સુવિધા દર વખતે આપવામાં આવતી નથી.

કાસિમે સ્પષ્ટ કર્યું કે તેમનો હેતુ કોઈ રાજકીય લાભ નહોતો પરંતુ ન્યાય અને માનવીય ગૌરવ માટેની લડાઈ છે. અમે ઈચ્છીએ છીએ કે દુનિયા પાકિસ્તાન પર દબાણ લાવે જેથી તેમને માનવીય સ્થિતિમાં રાખી શકાય અને ન્યાય મળી શકે.

ઇમરાન ખાનના પુત્રોની આ જાહેર અપીલે ફરી એકવાર પાકિસ્તાનની ન્યાયિક પ્રક્રિયા અને માનવ અધિકારોની સ્થિતિ તરફ આંતરરાષ્ટ્રીય ધ્યાન ખેંચ્યું છે.