ચેન્નાઈ સુપર કિંગ્સે પ્રથમ રમતમાં 176 રન બનાવ્યા હતા. રવિન્દ્ર જાડેજાની ફિફ્ટી અને એમએસ ધોનીની તોફાની ઇનિંગ્સે CSKને મોટા સ્કોર સુધી પહોંચાડ્યું છે.

આજના મેચની વાત કરીએ તો પહેલી ઈનિંગ્સ રમતા ચેન્નાઈ સુપર કિંગ્સે લખનૌ સુપર જાયન્ટ્સ સામે 176 રન બનાવ્યા હતા. સીએસકેની શરૂઆત નિરર્થક રહી કારણ કે રચિન રવિન્દ્ર શૂન્યના સ્કોર પર આઉટ થયો હતો. તે જ સમયે, કેપ્ટન રુતુરાજ ગાયકવાડ પણ કંઈ ખાસ ઈનિંગ્સ બતાવી શક્યો નહીં, જેણે 17 રન બનાવ્યા. ચેન્નાઈ તરફથી રવિન્દ્ર જાડેજાએ સૌથી વધુ રન બનાવ્યા, જેણે 40 બોલમાં 57 રનની શાનદાર ઈનિંગ રમી. તેણે પોતાની ઇનિંગમાં 5 ફોર અને 1 સિક્સ પણ ફટકારી હતી. આ દરમિયાન અજિંક્ય રહાણેએ પણ 24 બોલમાં 36 રનનું યોગદાન આપ્યું અને CSKને 176ના સ્કોર સુધી પહોંચાડવામાં મદદ કરી.

ચેન્નાઈ સુપર કિંગ્સના બેટ્સમેનોએ પાવરપ્લે ઓવરમાં 51 રન બનાવ્યા હતા, પરંતુ આ દરમિયાન ટીમે 2 મહત્વની વિકેટ પણ ગુમાવી હતી. આગળની 9 ઓવરમાં ટીમ 54 રન જ બનાવી શકી, જેના કારણે એવું લાગી રહ્યું હતું કે ટીમ મોટો સ્કોર હાંસલ કરી શકશે નહીં. ત્યારપછીની 3 ઓવરમાં રવિન્દ્ર જાડેજા અને મોઈન અલીએ મળીને 37 રન બનાવ્યા, જેના કારણે ટીમનો સ્કોર 18 ઓવર પછી 142 રન સુધી પહોંચી ગયો. મોઈન અલીએ 20 બોલમાં 3 સિક્સ વડે 30 રન બનાવ્યા હતા. તેના આઉટ થયા બાદ એમએસ ધોનીનું તોફાન આવ્યું. ધોનીએ 9 બોલમાં 3 ચોગ્ગા અને 2 છગ્ગા સાથે 28 રનની શાનદાર ઇનિંગ રમી હતી. હવે લખનૌ સુપર જાયન્ટ્સને જીતવા માટે 177 રન બનાવવા પડશે.

લખનૌ સુપર જાયન્ટ્સ બોલિંગ

લખનૌ સુપર જાયન્ટ્સ તરફથી ઘણી સારી બોલિંગ હતી. ખાસ કરીને ટીમે વચ્ચેની ઓવરોમાં 3 વિકેટ લીધી હતી અને માત્ર 54 રન આપ્યા હતા. કૃણાલ પંડ્યાએ ફરી એકવાર સારૂ પ્રદર્શન કર્યું હતુ. 3 ઓવરમાં માત્ર 16 રન આપીને 2 વિકેટ લીધી. જોકે રવિ બિશ્નોઈ અને મોહસીન ખાન થોડા મોંઘા સાબિત થયા હતા, પરંતુ તેઓએ 1-1 વિકેટ લીધી હતી. આ સિવાય યશ ઠાકુર અને માર્કસ સ્ટોઈનિસે પણ 1-1 વિકેટ લીધી હતી, પરંતુ ખાસ કરીને છેલ્લી 4 ઓવરમાં એલએસજીના બોલરોની જમકર ધોવાણ થયું હતું. CSKના બેટ્સમેનોએ છેલ્લી 4 ઓવરમાં 63 રન બનાવ્યા હતા.