અમદાવાદ શહેર ફરી એકવાર ઉત્સવના રંગમાં રંગાઈ ગયું છે! દર વર્ષની જેમ આ વર્ષે પણ ડિસેમ્બરના છેલ્લા સપ્તાહમાં કાંકરિયા લેક ખાતે ભવ્ય કાંકરિયા કાર્નિવલનું આયોજન કરવામાં આવ્યું છે. આજે મુખ્યમંત્રી ભૂપેન્દ્ર પટેલના હસ્તે આ કાર્નિવલનો રંગારંગ શુભારંભ કરવામાં આવ્યો. 

આ વર્ષે કાર્નિવલની શાન વધારવા માટે લોકપ્રિય કલાકારો કિંજલ દવે, ગીતા રબારી અને સાંઈરામ દવે જેવા કલાકારો ખાસ ઉપસ્થિત રહેશે અને પોતાના પરફોર્મન્સથી લોકોને ડોલાવશે. આ ઉપરાંત એકવા ડાન્સ અને સ્પેરો શો જેવા આકર્ષણો પણ કાર્નિવલનો ભાગ બનશે, જે મુલાકાતીઓને અનોખો અનુભવ કરાવશે.

કાંકરિયા કાર્નિવલની શરૂઆત

કાંકરિયા કાર્નિવલની શરૂઆત વર્ષ 2008માં થઈ હતી. કાંકરિયા તળાવ વિસ્તારના નવીનીકરણ સાથે જ આ કાર્નિવલની શરૂઆત કરવામાં આવી હતી, જે આજે અમદાવાદના સાંસ્કૃતિક ઉત્સવોનો એક મહત્વપૂર્ણ ભાગ બની ગયો છે. વર્ષોથી આ કાર્નિવલમાં અનેકવિધ ફેરફારો અને નવા આકર્ષણો ઉમેરવામાં આવ્યા છે. આ કાર્યક્રમ ખાસ કરીને ગુજરાતના સમૃદ્ધ સાંસ્કૃતિક વારસાને ઉજાગર કરે છે અને સ્થાનિક કલાકારો અને મનોરંજનકારોને એક ઉત્તમ પ્લેટફોર્મ પૂરું પાડે છે.