રાજકોટ રેન્જ આઈ.જી અશોકકુમાર યાદવ અને રાજકોટ જિલ્લા પોલીસવડા હિમકર સિંહની સૂચનાના પગલે ડીવાયએસપી સિમરન ભારદ્વાજના માર્ગદર્શન હેઠળ ગુમ થયેલા વ્યક્તિઓને શોધી કાઢવા પોલીસની ટીમ તપાસમાં હતી. દરમિયાન ધોરાજી પોલીસ સ્ટેશનના પીઆઇ આર.જે.ગોધમના માર્ગદર્શન હેઠળ ધોરાજીના જુના ઉપલેટા રોડ પર રાધાનગરમાં રહેતા હારૂનભાઈ સુલેમાનભાઈ શેઠા(ઉ.વ 62) માનસિક બીમાર હોય આજથી ૨૦ વર્ષ પૂર્વે 2005માં પોતાના ઘરેથી ક્યાંક જતા રહ્યા હતા. જે હાલ હિમાચલ પ્રદેશના કાંગરા જિલ્લાના નૂરપુર ખાતે મળી આવતા ત્યાંની સ્થાનિક પોલીસ સાથે ધોરાજી સિટી પોલીસે સંપર્ક કરી ગુમ થનારા હારૂનભાઇ ધોરાજીના હોય જેથી પોલીસની ટીમે તેમના પરિવારની શોધખોળ શરૂ કરી હતી.

હારૂનભાઈને અહીં ધોરાજી લાવવામાં આવ્યા હતા. બાદમાં તેમના પરિવાર સાથે મિલન કરાવ્યું હતું. બે દાયકા પૂર્વે ઘરના સભ્ય ગુમ થયા બાદ પરિવારજનોએ તેમના જીવિત થવાની આશા પણ છોડી દીધી હતી. તેવા સંજોગોમાં પોલીસે પરિવારના સભ્યને શોધી કાઢતા આ પરિવારે પોલીસ પ્રત્યે આભારની લાગણી વ્યકત કરી હતી. આ કામગીરીમાં ધોરાજી સિટી પોલીસ સ્ટેશનના પીઆઇ આર.જે.ગોધમ, પીએસઆઇ પી.કે. ગોહિલ, હેડ કોન્સ્ટેબલ નિલેશભાઈ મકવાણા, પંકજભાઈ તલસાણીયા, કોન્સ્ટેબલ નારણભાઈ,શક્તિસિંહ અને યોગેશભાઈ સાથે રહ્યા હતા.