સલાયામાં છેલા ઘણા સમયથી પીજીવીસીએલ દ્વારા વીજ ચેકીંગ હાથ ધરાઇ છે. જેમાં ગઈકાલે સવારના સમયે પૂરતા પોલીસ બંદોબસ્ત તેમજ એસઆરપી જવાનો સાથે પીજીવીસીએલની અનેક ટુકડીઓએ સલાયામાં વીજ ચેકીંગ શરૂ કર્યું હતું. જેમાં સલાયામાં જુદા જુદા વિસ્તારમાંથી રૂા. 18.56 લાખ જેટલી વીજચોરી ઝડપાઈ હતી.

આ તમામ લોકો સામે કાયદેસરની કાર્યવાહી કરવામાં આવેલ હતી. આમ સલાયામાં આટલી મોટા પ્રમાણમાં વીજ ચોરી પકડાતા હાલ વીજચોરી કરતા ઇસમોમાં ફફડાટ જોવા મળ્યો હતો. સલાયામાં કુલ વપરાશમાંથી મોટા ભાગનો વપરાશ ગેરકાયદેસર થઈ રહ્યો હોવાનું પીજીવીસીએલ દ્વારા કહેવામાં આવી રહ્યું છે. હજુ આવનારા દિવસોમાં પણ આ વીજ ચેકીંગ હજુ જોરશોરથી ચાલુ રહેશે. અને વીજચોરી બંધ કરવા પીજીવીસીએલ મક્કમ હોવાનું જણાવાઈ રહ્યું છે.