નાના બાળકોના માતા-પિતા માટે લાલબત્તી સમાન કિસ્સો સામે આવ્યો છે. વડોદરાના નવાપુરા વિસ્તારમાં ઘર બહાર ફિટ કરેલા હીંચકામાં રમતા 10 વર્ષના કિશોરનું મોત થયુ છે. બાળકે ગળામાં પહેરેલી ટાઇ હીંચકાના હુકમાં ફસાતા ગળે ટૂંપો લાગી ગયો હતો. પિતાની નજર પડતા તેઓ પુત્રને નીચે ઉતારી તરત જ ખાનગી હોસ્પિટલમાં સારવાર માટે લઇ ગયા હતા  પરંતુ 10 વર્ષીય રચિત પટેલનું સારવાર મળે તે પહેલા જ મોત થયું છે. એકના એક પુત્રનું અકાળે મોત થતા પરિવારમાં શોકનો માહોલ છવાયો છે.

પોલીસ સૂત્રોના જણાવ્યાનુસાર, લક્કડપીઠા માર્ગ પર ગનુબકરીના ખાંચામાં રહેતા ધરમભાઇ પટેલ શાકભાજીનો વેપાર કરે છે. તેમનો 10 વર્ષનો દીકરો રચિત ધો. 5 માં અભ્યાસ કરે છે. રચિતે ગઈકાલે એક ફંક્શનમાં હાજરી આપવાની હોવાથી ટાઇ પહેરી હતી. ફંક્શનમાંથી પરત આવ્યો ત્યારે તે હીંચકા પર રમતો હતો ત્યારે તેને ફાંસો લાગી ગયો હતો. જે હીંચકાના કડામાં ફસાઈ જતા બેભાન થયો હતો. તેના પિતા ઘરની બહાર નીકળ્યા ત્યારે તેમણે પુત્રને જમીન પર ફસડાઈ પડેલો જોયો હતો. બાદમાં તેઓ રચિતને તાત્કાલિક માંજલપુરની એક ખાનગી હોસ્પિટલમાં લઇ ગયા હતા. જ્યાં સારવાર દરમિયાન તબીબે તેને મૃત જાહેર કર્યો હતો. નાના બાળકોને એકલા રમતા મૂકતા વાલીઓ માટે આ લાલબત્તી સમાન કિસ્સો  છે.