દ્વારકા તાલુકાના વરવાળા ગામેથી પોલીસે રાજેશ રામા ચૌહાણ અને જેશા સામરા ચૌહાણને ચલણી નોટોના નંબર ઉપર એકી-બેકીનો જુગાર રમતા ઝડપી લીધા હતા. અન્ય એક કાર્યવાહીમાં કારાભાઈ લાખાભા કરમટા અને ચંદ્રેશ બાબુભાઈ મકવાણાને પોલીસે એકી-બેકીનો જુગાર રમતા મુદ્દામાલ સાથે ઝડપી લઈ, કાર્યવાહી કરી હતી.

મીઠાપુર પોલીસે અમિત કિશોરભાઈ ચારોલીયા અને ભીખલ રમેશ સંચાણિયાને તીનપત્તીનો જુગાર રમતા ઝડપી લઈ, મુદામાલ કબજે કર્યો હતો.

ભાણવડ નજીક કારની અડફેટે બાઈક સવાર યુવાન ઘવાયો

ભાણવડ તાલુકાના માનપર ગામે રહેતા ભરતભાઈ ગોવિંદભાઈ બેરા નામના યુવાન તેમના જી.જે. 10 સીસી 6001 નંબરના મોટરસાયકલ પર જામ જોધપુરથી પોતાના ઘરે આવી રહ્યા હતા, ત્યારે ભાણવડથી આશરે 21 કિલોમીટર દૂર ધારાગઢ ગામના હાઈવે પરથી પસાર થતી વખતે પૂર ઝડપે અને બેફિકરાઈપૂર્વક આવી રહેલી જી.જે. 10 ડી.ઈ. 4190 નંબરની સેલેરીયો મોટરકારના ચાલક ભાવેશભાઈ હરજીભાઈ કલોલા (રહે. જામ જોધપુર) એ ભરતભાઈના મોટરસાયકલ સાથે ધડાકાભેર અકસ્માત સર્જતા તેમને શરીરના જુદા જુદા ભાગોમાં નાની-મોટી ઈજાઓ થવા પામી હતી.

આ બનાવ અંગે ગોવિંદભાઈ મેરામણભાઈ બેરાની ફરિયાદ પરથી ભાણવડ પોલીસે કારના ચાલક ભાવેશભાઈ હિરજીભાઈ કલોલા સામે જુદી જુદી કલમ હેઠળ ગુનો નોંધી, ધોરણસર કાર્યવાહી કરી હતી.