રાજકોટ કલેકટર કચેરીમાં પાકિગ કરવામાં આવતા વાહનોમાંથી અહીં ગુજરાત ઇન્ડસ્ટ્રીઝ સિકયોરીટી ફોર્સનો જવાન પેટ્રોલ કાઢતા રંગેહાથ ઝડપાઇ ગયો હતો.જેનો વીડિયો પણ સામે આવ્યો હતો.જેથી વાત અધિક કલેકટર સુધી પહોંચી હતી.બાદમાં આ જવાનનો અધિકારીએ બરોબરનો કલાસ લીધો હતો.ચોકીદાર જ ચોર નિકળ્યાની આ ઘટનાને ભારે ચકચાર મચાવી હતી.
જાણવા મળતી વિગતો મુજબ, રાજકોટ કલેકટર કચેરીમાં ગુજરાત ઇન્ડસ્ટ્રીઝ સિકયુરિટી ફોર્સના જવાનોની ત્રણ શીફટમાં રાઉન્ડ ધ કલોક ડુટી ફાળવવામાં આવી છે. જેમાં છેલ્લા કેટલાક સમયથી પાકિગમાં રાખવામાં આવતા વાહનોમાંથી પેટ્રોલ ચોરી થતી હોવાની વ્યાપક ફરિયાદો ઉઠવા પામી હતી.
પેટ્રોલ ચોરીની આ ફરિયાદને લઇ ખાનગી રીતે વોચ રાખવામાં આવી હતી. દરમિયાન અહીં ફરજ બજાવતા હિસાબી શાખાના કારકૂનના બાઈકમાંથી પેટ્રોલ કાઢી રહેલો ગુજરાત ઇન્ડસ્ટ્રીઝ સિકયુરિટી ફોર્સનો જવાન રંગે હાથ ઝડપાયો હતો. જેનો વીડિયો ઉતારીને કલેકટરને મોકલવામાં આવ્યો હતો. કેમેરા ન હોય તેવા સ્થળે પાર્ક કરેલા વાહનોમાંથી આ શખસ પેટ્રોલ કાઢતો હતો. આ મામલો અધિક કલેકટર સુધી પહોંચતા અધિક કલેકટરે જવાનનો બરોબરનો કલાસ લીધો હતો.