યુએસ ડોજ વિભાગના વડા ઈલોન મસ્કે દાવો કર્યો હતો કે તેમના સોશિયલ મીડિયા પ્લેટફોર્મ એક્સ (ટ્વિટર) પર યુક્રેનથી સાયબર હુમલો થયો હતો, જેના કારણે એક્સનું સર્વર સમગ્ર વિશ્વમાં ડાઉન થઈ ગયું હતું. ગઈકાલે એક્સનું સર્વર ઘણી વખત ડાઉન થયું. સર્વર ક્યારેક સારું કામ કરતું હતું, પણ પછી તે ફરીથી ક્રેશ થઈ ગયું હતું.

એક ઈન્ટરવ્યું દરમિયાન ઈલોન મસ્કે કહ્યું, અમને બરાબર ખબર નથી કે શું થયું, પરંતુ એક્સ સિસ્ટમને તોડી પાડવા માટે યુક્રેન ક્ષેત્રના આઈપીએ એડ્રેસનો ઉપયોગ કરીને સાયબર હુમલો કરવામાં આવ્યો હતો. જ્યારે એક્સની સ્થિતિ વિશે પૂછવામાં આવ્યું ત્યારે તેમણે કહ્યું કે તે હવે સંપૂર્ણપણે ઠીક છે.

અગાઉ એક્સ પોસ્ટ પર પણ, ઈલોન મસ્કે સાયબર હુમલામાં કોઈ ખતરનાક જૂથ અથવા દેશની સંડોવણીની આશંકા વ્યક્ત કરી હતી. તેમણે લખ્યું, એક્સ પર સાયબર હુમલો થયો છે. એક્સ પર દરરોજ સાયબર હુમલા થઈ રહ્યા છે, પરંતુ આ વખતે એક્સને મોટા પાયે નિશાન બનાવવામાં આવ્યું હતું. શું આ કોઈ ખતરનાક જૂથનું કામ છે કે પછી કોઈ દેશ પણ તેમાં સામેલ છે? તેની ચકાસણી કરવામાં આવી રહી છે.

ઈલોન મસ્કે સાયબર હુમલા અંગે આ દાવો કર્યો છે જ્યારે તેમણે તાજેતરમાં સ્ટારલિંક વિશે કહ્યું હતું કે તેના વિના યુક્રેનની ફ્રન્ટલાઈન તૂટી જશે. જોકે, તેમણે ખાતરી આપી કે તેઓ તેને રોકશે નહીં. આ ઉપરાંત, ઈલોન મસ્કે યુક્રેનિયન રાષ્ટ્રપતિ પર વ્હાઇટ હાઉસમાં રાષ્ટ્રપતિ ટ્રમ્પ સાથે દલીલ કરવા બદલ પણ હુમલો કર્યો.

ઈલોન મસ્કે રશિયા યુદ્ધ અંગે યુક્રેનિયન રાષ્ટ્રપતિ વ્લાદિમીર ઝેલેન્સકીની ઘણી વખત ટીકા કરી છે. યુક્રેનિયન રાષ્ટ્રપતિને સરમુખત્યાર ગણાવતા મસ્કે કહ્યું કે તેમને ખબર હતી કે તેઓ ચૂંટણી ખરાબ રીતે હારી જશે, તેથી તેમણે ચૂંટણી રદ કરી. હકીકતમાં, યુક્રેનના લોકો ઝેલેન્સ્કીને નફરત કરે છે. તેમણે પુરાવા વિના ઝેલેન્સકી પર એક વિશાળ ભ્રષ્ટાચાર મશીન ચલાવવાનો આરોપ લગાવ્યો જે યુક્રેનિયન સૈનિકોના મૃતદેહોમાંથી પૈસા કમાય છે. વોગ મેગેઝિનના 2022 ના કવર ફોટો શેર કરતા, મસ્કે કહ્યું હતું કે, જ્યારે બાળકો યુદ્ધના મોરચે ખાઈમાં મરી રહ્યા હતા ત્યારે તેમણે આ કર્યું હતું. આ ફોટામાં, ઝેલેન્સકી તેની પત્નીનો હાથ પકડીને બેઠા હતા.