પંજાબના ભટિંડામાં એક બસ પુલ પરથી નદીમાં ખાબકતા 8 લોકોના મોત થયા છે જ્યારે 20 લોકો ઘાયલ થયા છે. આ અકસ્માત ભટિંડા જિલ્લાના જીવન સિંહ વાલા ગામ પાસે થયો હતો. બસ અકસ્માતમાં ડ્રાઈવરનું પણ મોત થયું છે. જેની ઓળખ માનસાના રહેવાસી બલકારસિંહ તરીકે થઈ છે. બચાવ કામગીરી માટે NDRFની ટીમ ઘટનાસ્થળે પહોંચી ગઈ છે.

બસ નદીમાં કેમ પડી તેનું કારણ હજુ સુધી જાણી શકાયું નથી. હાલમાં લોકોને બહાર કાઢવાની કામગીરી ચાલી રહી છે. આ બસ સરદુલગઢથી ભટિંડા આવી રહી હતી. ભટિંડા તલવંડી સાબો રોડ પર જીવન સિંહ વાલા ગામ પાસે એક ખાનગી કંપની પાસે આ અકસ્માત થયો હતો. બસમાં 30થી 35 મુસાફરો સવાર હતા.

ગામલોકો સીડી લઈ ઘટનાસ્થળે પહોંચ્યા
પોલીસના જણાવ્યા અનુસાર ગુરુ કાશી ટ્રાન્સપોર્ટની બસ લોકોને લઈને ભટિંડા તરફ જઈ રહી હતી. બસ અચાનક કાબૂ બહાર જઈ જીવનસિંહ વાલા ગામ પાસે નાળામાં પલટી ગઈ હતી. આ પછી બસમાં મુસાફરી કરી રહેલા લોકોમાં ચીસાચીસ મચી ગઈ હતી. માહિતી મળતા જ આસપાસના લોકો ઘટનાસ્થળે પહોંચી ગયા હતા. તેણે આ અંગે પોલીસને પણ જાણ કરી હતી.

ભટિંડાના ડીસી શૌકત અહેમદ પારે અને એસએસપી અમ્નીત કૌંડલ પણ ઘટનાસ્થળે પહોંચ્યા હતા. નજીકના ગ્રામજનો સીડીનો ઉપયોગ કરીને સ્થળ પર પહોંચ્યા હતા. લોકોને સીડીઓ દ્વારા બહાર કાઢવામાં આવ્યા હતા. બસને ક્રેનની મદદથી નાળામાંથી બહાર કાઢવામાં આવી છે.