પોરબંદરના નરસંગ ટેકરી વિસ્તારમાં રહેતા યુવાને ગળાફાંસો ખાઇ આપઘાત કરી લેતા મૃતદેહને પી.એમ. માટે હોસ્પિટલે લવાયાબાદ પરિવારજનોએ એવુ જણાવ્યુ હતુકે મહાનગરપાલિકાના તંત્રએ મકાનના આધાર પુરાવા રજુ કરવા નોટીસ આપ્યા બાદ ગુમસુમ રહેતો હતો.
બનાવની વિગત એવી છે કે નરસંગટેકરી વિસ્તારમાં રહેતા અને કડીયાકામ કરતા ૩૫ વર્ષના હરીશ દેવાભાઇ શીંગરખીયા નામના યુવાને ગઇકાલે રાત્રે તેના ઘરે ઉપરના માળે ગળાફાંસો ખાઇ લીધો હતો.
 સવારે જ્યારે પરિવારજનો ઉપર ગયા ત્યારે ચુંદડીથી ગળાફાંસો ખાઇ લીધેલી હાલતમાં હરીશનો મૃતદેહ જોઇને આભ ફાટયુ હતુ અને સરકારી ભાવસિંહજી હોસ્પિટલ ખાતે મૃતદેહને લઇ જવાતા પોસ્ટમોર્ટમની કાર્યવાહી થઇ હતી. મોટી સંખ્યામાં નરસંગટેકરી વિસ્તારના લોકો અને અનુસૂચિત જાતિસમાજના લોકો દોડી ગયા હતા.
ઉદ્યોગનગર પોલીસ દ્વારા નિવેદન લેવામાં આવતા એવુ જણાવવામાં આવ્યુ  હતુ કે મહાનગરપાલિકાએ નરસંગ ટેકરી વિસ્તારમાં મકાનની કાયદેસરતા અંગે અનેકને નોટીસ આપી છે અને નોટીસ મળી ત્યારથી હરીશ શીંગરખીયા ગુમસુમ રહેતો હતો. આથી તેણે આ કારણસર જ આપઘાત કર્યો છે કે કેમ? તે અંગે પોલીસે ઉંડાણથી તપાસ હાથ ધરી છે.