ભારતની યુવા શૂટર મનુ ભાકરે ગયા મહિને પેરિસ ઓલિમ્પિક્સ 2024માં તેના ઐતિહાસિક પ્રદર્શનથી દેશને ગૌરવ અપાવ્યું હતું. મનુએ મહિલાઓની 10 મીટર એર પિસ્તોલ અને 10 મીટર એર પિસ્તોલ મિશ્રિત ટીમ ઈવેન્ટમાં બે કાંસ્ય ચંદ્રક જીત્યા. આ સિદ્ધિ એક જ ઓલિમ્પિક એડિશનમાં એક કરતાં વધુ મેડલ જીતનારી સ્વતંત્ર ભારતની મનુ પ્રથમ એથ્લેટ બની છે. તાજેતરમાં જ જ્યારે મનુ ભાકરે જાહેર કાર્યક્રમોમાં તેની સાથે ઓલિમ્પિક મેડલ લઇ જવાનું શરૂ કર્યું ત્યારે તેને સોશિયલ મીડિયા પર ટ્રોલનો સામનો કરવો પડ્યો હતો..

મનુએ ટ્રોલ કરનારાઓને આપ્યો જડબાતોડ જવાબ

મનુ ભાકરે તેના સોશિયલ મીડિયા એકાઉન્ટ પર ટ્રોલર્સને જડબાતોડ જવાબ આપ્યો છે. મનુએ લખ્યું છે કે, "પેરિસ ઓલિમ્પિક 2024માં જીતેલા મારા બે બ્રોન્ઝ મેડલ ભારતના છે. જ્યારે પણ મને કોઈ ઈવેન્ટમાં આમંત્રિત કરવામાં આવે છે અને મેડલ બતાવવા માટે કહેવામાં આવે છે  ત્યારે હું ગર્વ સાથે કરું છું. આ મારી સુંદર સફર શેર કરવાની મારી રીત છે."

આ તે ટ્રોલર્સને યોગ્ય જવાબ હતો જેમણે મનુ પર દરેક જગ્યાએ તેના મેડલ બતાવવામાં 'ઓબ્સેસ્ડ' હોવાનો આરોપ લગાવ્યો હતો. મનુએ ઘણી ઈવેન્ટ્સમાં ભાગ લીધો હતો, જ્યાં લોકો તેના મેડલને લઈને તેની મજાક ઉડાવતા હતા.

બ્રેક પર છે મનુ ભાકર

હાલમાં મનુ ભાકર બ્રેક પર છે અને તેના કોચએ સંકેત આપ્યો છે કે તે આગામી ત્રણ મહિના સુધી સ્પર્ધામાં પરત નહીં ફરે. તે પહેલાથી જ બે ઓલિમ્પિક અને વર્લ્ડ ચેમ્પિયનશિપ મેડલ, 19 વર્લ્ડ કપ મેડલ અને કોમનવેલ્થ અને એશિયન ગેમ્સમાં એક-એક ગોલ્ડ મેડલ જીતી ચૂકી છે.