ખંભાળિયામાં સતવારા જ્ઞાતિની નવી વાડી પાસેથી પોલીસે ખોડીયાર ચોકના રહીશ કિશન કાનજી બગડા (ઉ.વ. ૧૯) ને તેમજ અત્રે આશાપુરા ચોક વિસ્તારમાંથી ચોખંડા-બજાણા રોડ વિસ્તારના રહીશ રવિ અશોક ઘેડિયા (ઉ.વ. ૨૫) ને મીઠાપુરના સુરજકરાડીની સોની બજાર ખાતેથી મોજપ ગામના નંઢાભા સાવજાભા કુંભાણીને તેમજ ઓખામાં કનકાઈ જેટી પાસેથી અજય ભુપત વાળા (ઉ.વ. ૩૯) ને તાળા તપાસતા તથા શંકાસ્પદ હાલતમાં પોલીસે ઝડપી લઈને જરૂરી કાર્યવાહી કરી હતી.
ભાણવડમાં હાઈસ્કુલ ચોક ખાતેથી પોલીસે પોરબંદર તાલુકાના સીમર ગામના રહીશ રણજીત રામ કારાવદરા નામના ૩૦ વર્ષના શખ્સને કેફી પીણું પીધેલી હાલતમાં રૂપિયા એક લાખની કિંમતની સ્વીફ્ટ મોટરકાર ચલાવતા ઝડપી લઇ, ગુનો નોંધ્યો હતો.
દ્વારકાના રૂપેણબંદર વિસ્તારમાંથી પોલીસે તોસિફ ગફુર ભેસલીયા નામના અઢાર વર્ષના શખ્સને છરી સાથે નીકળતા પોલીસે ઝડપી લઈ, મોટરસાયકલ અને મોબાઈલ ફોન સહિત કુલ રૂપિયા ૨૫,૦૨૦ નો મુદ્દા માલ કબજે કર્યો છે. આ જ વિસ્તારના દાઉદ ઓસમાણ ભેસલીયા (ઉ.વ. ૪૮) ને પોલીસે છરી સાથે ઝડપી લઈ, જી.પી. એક્ટ ની કલમ ૧૩૫ (૧) હેઠળ કાર્યવાહી કરી હતી.